'Opolisi tayi longele kumwe noongangala' – Aakalimo yomOkandjengedi

TUNOHOLE MUNGOBA

OSHAKATI

Ø Opolisi ya gandja uusama kelongitho lyiikolitha niingangamithi.

Omanyenyeto ngoka ga ningwa kaakalimo yomOkandjengedi South, oga ningwa pethimbo lyomutumba gwaakwashigwana gwa ningwa kelelo lyondoolopa yaShakati.

“Kehe oshiwike egumbo molukanda nduka ohali tewa. Otushi oongangala dhoka, ohadhi zi mutse na otuli muutile molwaashoka opolisi otayi longele kumwe noongangala dhoka,” gumwe gwomaakwashigwana a popi.

Okwa nyenyeta woo kombinga lyegumbo limwe mOkandjengedi South ndyoka li li egumbo koongangala ndhoka hadhi yeke aantu oongodhi dhawo noombele.

Omukwashigwana gumwe okwa nyenyeta kombinga yopolisi ndjoka kayi hole oku ya yambidhidha. Okwa popi kutya ngele ya dhengele opolisi aluhe ohayi ya pula kutya omolwashike aluhe oyo ye na omaupyakadhi. Okwa pula kutya otaya kala ngiini yiinekela opolisi ngele kayi na ehalo okulongela kumwe nayo.

Aakwashigwana oya popi woo kutya opolisi ihayi ya yambidhidha molwaashoka kayi na iiyenditho.

Omudhingoloko ngoka ogwa gwililwapo kiimbuluma yomateyo gomagumbo, omayeko gomaliko oshowo omakwatonkonga.

Omukonaakoni Thomas Aiyambo gwopolisi yaNamibia, okwa yamukula komanyenyeto gaakwashigwana na okwa gandja uusama kelongitho lyiikolitha niingangamithi.

“Uuna twa tula miipandeko aantu mboka, ngele ya holoka mompangu itaya dhimbuluka shoka ya ningi uusiku wapiti.”

Okwa pula aakwashigwana ya hulithepo okutuma aanona ye ke ya landele otombo noku ya pitika yiipyakidhile noskola. Okwa pula aakwashigwana ya longele kumwe nopolisi.