Opolisi tayi konaakona oshipotha sheidhipago

Opolisi yaShana otayi konaakona oshipotha sheidhipago ndyoka lya ningilwa moocela dhopolisi yaNdangwa oshiwike sha piti.Okwa holoka omapopyo kutya oshiningwanima shomomasiku 27 gaSepetemba kashi shi eidhipago ihe edhipago lya ningwa, na osha ningwa kutya eidhipago molwaashoka nakuninga oshihakanwa okuli omupambele gwomunambelewa gwopolisi. Omapopyo ngoka oga ekelwashi kwaangoka ta longo pehala lyaKomanda gwOpolisi yaShana kOmufala Karel Theron. Theron okwa lombwele oNamibian Sun kutya, Komanda gwOpolisi yaShana, Rauha Amwele okwa gandja oshinakugwanithwa ku ningwe omakonaakono omanga inaya molweendo lwe lwiilonga lu na sha nekondjitho lyuukongo waaheli pampango mEtosha. Okwa lopotwa kutya nakusa Naule okwa tulwa miipandeko ongulohi yomasiku 25 gaSepetemba konima sho omukadhona gwe omunamimvo 26, Petrina Thomas, a tsuwa iikando o-14 sha ningilwa mondunda ye yokulala.Nakusa okwa li kwa tegelwa a holoke mompangulilo yaMangestrata gwaNdangwa ihe okwiimangelekele mondjeedhililo yopolisi.Komufala Amwele okwa li a popi kutya, Naule okwa adhika iimangelekela mondjeedhililo konima owala sho a li a falwa a ka ningiwe omapulaapulo. “Ongula yomasiku 27 gaSepetemba, Naule pamwe nookwatwa ookwawo oya li ya falwa ya kaningilwe omapulaapulo omanga inaya holoka komeho yompangu. Konima sho ya pulwaapulwa, aapolisi oya fala aakwatwa dhilwe kompangu omanga Naule a falwa kondjeedhililo oye awike. Aapolisi sho ya ka galuka opo ye mu fale kompangululo oya adha a eendjelela moocela dhopolisi, a sa,” Amwele ta ti. Naule ngoka a zile mOmukunda Ohalumbele mOshikandjohogololo shaNesi, otaku popiwa a tsu Thomas iikando 14 sha landula oontamanana dheetithwa kokoondomaa ndjoka ya kana.Oshiningwanima shika osha ningilwa mondunda ya Thomaas ndjoka ha hiila mOmashaka, mOndangwa. Pahapu dhopolisi, anuwa omumati gwe okwa yi kuye ongulohi ndjoka ihe oya tameke taya nyenyeta omolwa okondoma ndjoka kayi mo mondunda, ya li ya thigwa mo komumati gwe ongulohi ya piti.Sho omukadhona ina vula okugandja omayamukulo kutya okondoma ndjoka oya yi peni, omumati okwa kutha ombele na okwe mu tsu iikando ya thika po-14. Naule okwa tulwa miipandeko ongulohi oyo tuundjoka. Thomas ngoka ha longo mokastola keli popepi nOmashaka okwali a taaambelwa moshipangelo shaNandjokwe na okwa li a lalekwa mo.Ofamili yaNaule oya popi kutya inayi hokololelwa kutya Naule okwa si ngiini, noponzapo yeso inapu shangwa. Oya popi kutya otaya pangele okutsakanene nOpolisi yaNdangwa opo yuuve kutya omukwanezimo gwawo okwa si ngiini. ILENI NANDJATO

Opolisi tayi konaakona oshipotha sheidhipago

Comments

Namibian Sun 2025-09-18

Please login to leave a comment

Opolisi tayi konaakona oshipotha sheidhipago

Comments

Namibian Sun 2025-09-18

Please login to leave a comment

Login