Ooskola naavali taya tamanana omolwa oompango dhoskola

Omuvali gwomOvenduka okwa pula uuministeli welongo opo wu tale moompango dhooskola ndhoka tadhi indile aanona ya ye kooskola nomafufu gwoAfro.

Okwa popi kutya okanona ke oka tumwa kegumbo sho ka thiki poskola yaSuiderhof Primary School ke na omafufu omahupi gwoAfro.

Momatumalaka okafupi hoka ka tuminwa Ms Stevens, oka popi kutya oskola oya tseyithile Elizabeth Ndura kutya onkalo yomafufu ndjoka itayi pitikwa poskola, kwiikwatelelwa kompango yoskola ndjoka tayi adhika pepandja 33.

Sho a ningilwa omapulo, omukuluntuskola poskola yaSuiderhof Primary School, Adriaan van Wyk okwa popi kutya oskola kehe oyi na oompango.

Okwa popi kutya okwa tegelelwa kehe gumwe a simaneke nokwiiyutha kompango dhoskola, pwaahena omapulo kutya oshi li mondjila nenge osha puka.

Pethimbo lya faathana omuvali gumwe okwa shanga kepandja lyoFacebook kutya okanona ke oka tindilwa okushanga ekonaakono lyopakana moskola yaJan Mohr High School molwaashoka oke na omapando gorasta momutse.

Pamushangwa gwe oskola ndjoka inayi pitika omapando gorasta.

Nonando ongaaka omuniilonga poskola mpoka okwa popi kutya okanona hoka oka tumwa kegumbo molwaashoka omapando gako oge na omalwaala ga yooloka, shoka inashi pitikwa moskola.

Omukomeho gwelongo moKhomas, Gerard Vries okwa popi kutya kape na owala oskola tayi tumu okanona kegumbo omolwa omapando gokomutse oshikando shotango na oshi na okukala oshinima hashi ningwa olundji. Okwa popi kutya aavali ohaya shaina oompango dhoskola petameko nokonima ohaya ka nyenyeta kombinga yoompango dhoka.

Okwa pula aavali ya leshe oompango dhoskola.



JEMIMA BEUKES