Oondoolopa nadhi kandule po ompumbwe yomagumbo - Shaningwa

Ominista yEyambulepo lyOondoolopa nIitopolwa , Sophia Shaningwa, okwa pula aaleli yopaitopolwa noondoolopa opo ya kandule po ompumbwe yomalukalwa ndjoka yi li moshilongo ta popi kutya ye onga minister oku na oshinakugwanithwa shiilonga shoka a shainina.
“Onda shaina omukanda gwegwanithe po lyiilonga yandje pehala lyeni nomupresidende molwaashoka ongame owala tandi vulu okushaina omukanda ngoka moshikondo shika.”
Shaningwa okwa popi ngaaka pethimbo lyomutumba gwo
Association for Local Authorities in Namibia (ALAN) congress ngoka gwa ningwa mOshakati.
“Patsokumwe ndika otwa pumbiwa okushunitha pevi ompumbwe yomagumbo ndjoka monena ya thikama po-100 000. Otwa pumbwa okutunga omagumbo geli o-6 000 kehe omvula. Otwa pumbwa woo okulongitha omusholondondo gwaaningimaindilo ngoka guli moombelewa dhetu opo tu vule okukondolola egandjo lyevi nomagumbo. Ngoka otagu kala omukalo omuwanawa molwaashoka otatu mono kutya oolye ya mona omagumbo noolye inaya mona omagumbo,” minista ta ti.
Shaningwa okwa lombwele aakuthimbinga momutumba ngoka kutya, ewapaleko lyevi nokugandja omagumbo ogo oshilalakanenwa shotango tashi adhika momukanda gwiilonga ngoka a shaina, noshikumungu shoka osha pumbwa okuungaungiwa nasho momukalo guukwashili.
“Omadhina agehe gaamboka ya hala omavi naga shangwe, nuuna omuntu a mono evi nenge egumbo nadhidhilikwe. Onkalo ndjoka otayi ke tu kwathela mokutupopila uuna taku tiwa otatu otatu longo uulingilingi.”
OALAN oya pumbwa okuhogolola omupresidende omupe molwaashoka omupresidende gwawo nale Agnes Kafula okwa thigi po oshipundi shoka konima sho aningi oshilyo shoSwapo momutumba gwopaliamende.
Kakele kokuhogolola aaleli aape omutumba ngoka otagu ka kundathana woo iikumungu ye ya taalela ngaashiopoloyeka etungo lyehwata lyomagumbo, ewapaleko lyevi , oshikukuta ompumbwe yomeya oshowo embombolokelo lyaakwashigwana moondoolopa.

ILENI NANJDATO