Ookansela nale ya Swapo ya tulwa miipandeko

OGONE TLHAGE



OVENDUKA

Okomisi yoAnti-Corruption Commission (ACC) oshiwike sha piti oya tula miipandeko ookansela nale yatatu yongundu yaSwapo mondoolopa yaKahandja omolwa ekuto miilonga lyomukomeho gwiiyemo.

Mboka otaku popiwa ya piti pomunkulo ngoka a li a pitimo mokakonaakono kopoosa ndjoka.

Aanambelewa mboka oya tumbulwa komadhina kutya omupeha mayola nale Hileni Iita, omunashipundi gwokomitiye yelelo, Gideon Uwu-Khaeb oshowo oshilyo shokomitiye yelelo Helmi Maruru.

Mboka otaya tamanekelwa elongitho pambambo lyoonkondo dhombelewa mokulonga uulingilingi.

Oya holoka mOmpangulilo yaKahandja na oya pewa omboloha yooN$10 000 kehe gumwe. Mboka oye li oshitopolwa shaanambelewa mboka elelo lyawo lya li lya kuthwa miilonga mo2020, kominista Peya Mushelenga omolwa omalundilo guulingilingi melelo.

Mboka oya kutu miilonga, Pesella Nunda popoosa yostrategic executive of finance, information technology and asset management, nonando Elifas Hamunyela oye a li okandindate dhingi mokakonaakono ka ningwa.

Oonakuninga okakonaakono oya holola kutya, Hamunyela oye na kutwe miilonga ihe mboka oya tindi nokuhogolola Nunda.

Shoka osha ningwa pokati komwedhi Maalista nomwedhi Juli mo2018.

Ngele oya monika ondjo otaya ka pewa egeelo lyokufuta oshimaliwa inashi pitililamo poN$500 000 nenge ya tulwe modholongo oomvula inadhi pita po 25.

Aanambelewa mboka okwa tegelelwa ya holoke mompangu momasiku 15 gaMaalitsa.