Oohango dhaMei dha undulilwa komeho

ILENI NANDJATO

ONDANGWA



Aantu oyendji mboka yali taya longekidha okuhokana momwedhi Mei, oya undilile oohango dhawo komeho omolwa etukuko lyocorona, omanga aashona ya tokola okuya komeho niituthi yawo yoondjokana, palandulo lyomulandu gwaantu inaya pitilila pomulongo, oshowo okwiikala kokule.

Aalongekidhi yoohango oya popi kutya otashi zi kaahokanathani opo ya pule komeho noohango pethimbo lyoshikako shoohango.

MoNamibia aantu oyendji ohaya hokanene koompangulilo nenge moongeleka, niituthi yawo ohayi nana aantu oyendji.

Pethimbo lyetseyitho lyomupresidende lyopaulumomhumbwe omagongalo gopamwe oga uthwa owala okukala naantu ya thika pomulongo.

Amushanga-ndjai gwoEvangelical Lutheran Church in Namibia (Elcin), Omusita Alpo Enkono, okwa popi kutya aantu oyendji mboka yali ya shangitha oohango dhawo oya pula ongeleka opo dhikalekwe manga. Enkono okwa popi kutya aantu yendji mboka yali ye na okukala noohango momwedhi Mei oya ukitha oohango dhawo komeho nongeleka kayi na mo etokolo lyasha momatokolo gawo. Okwa popi kutya elelo lyongeleka okwa tegelelwa li ninge omutumba momwedhi twa taalela, ihe omolwa omilandu ndhoka dha tulwapo manga otashi vulika omutumba ngoka kagu ningwe manga.

Enkono okwa popi kutya pethimbo ndika otaya simaneke owala omatokolo gaahokanathani na itaya vulu okugandja omayele gasha.

Omumbosfi Lukas Kaluwapa Katenda gwoReformed Evangelical Anglican Church (REACH) okwa popi kutya mboka yahala okuhokanathana otaya vulu okupula komeho nenge okukaleka iituthi yawo.

Ngele otaya pula komeho oya pumbwa okulandula omilandu ndhoka dha tulwapo.

“Oohango dhopamuthigululwakalo iituthi yetumba kaaihokanathani naavali, naashoka osho hashi etitha ku hiwe aantu oyendji opo ya ninge oombangi dhiituthi mbyoka. Oyendji otaya undulile komeho iituthi yawo nomatompelo kutya oya longitha nale iimaliwa oyindji melongekidho lyiituthi yawo na oya hiya nale aantu oyendji, Katenda a popi” “Ondjokana kayi na sha naantu oyendji ya kala poshituthihango. Shoka sha simana aantu yaali mboka taya yi mondjokana, naashoka osho ta tu popi kutya otaya vulu okupula komeho shampa owala taya landula omilandu.”