Ondoolopa yaRundu oya nyata noonkondo

KENYA KAMBOWE

Ongundu yoKavango East Regional Youth Forum oya popi kutya onyata mondoolopa yaRundu oya etitha eshuno pevi lyaatalelipo mondoolopa ndjoka, na oya pula opo ku ningwe omalunduluko.

Kape na ngoka ta tindi mwa kwatelwa elelo lyondoolopa ndyoka, kutya ondoolopa oya nyata noonkondo molwaashoka ehala kehe lyaana sha olya ninga etoto lyoku ekelahi iiyagaya.

Kakele konyata ndjoka, natango elelo lyondoolopa otali ndopa okukutha po iiyagaya pomahala goongeshefa oshowo pomagumbo nonando aakwashigwana ohaya futu omayakulo ngoka kehe omwedhi.

Oshifokundanaeki shoNamibian Sun osha nongele woo nkene aanona yoomvula okutameka pumbali haya kala taya dhana moonyata ndhoka, pethimbo mpoka epangelo tali ningi omahwahwameko ga nuninwa okukondjitha omikithi ngaashi Hepatitis.

Nonando omahangano gamwe mondoolopa ndjoka oga kambadhala okuwapeka ondoolopa, inashi kwatha sha molwaashoka uuna pehala pwa wapalekwa ohashi kutha owala esiku nenge omasiku gaali, lyo olya tulwa nale iiyagaya.



Kuyele nuumvo, Omupresidende Hage Geingob okwa tula miilonga omahwahwameko gokuwalakeka oshilongo, ihe ondoolopa yaRundu inayi gumwa komahwahwameko ngoka molwaashoka otayi nyata esiku nesiku.



Mehuliloshike ndika lyapiti, oKavango East Regional Youth Forum oya wapaleke ondoolopa ndjoka konima sho ya dhidhilike kutya itashi kwatha sha ngele oya kala ya tegelela aakuthimbinga melelo lyondoolopa yeshi ninge.

Sho a ningwa naye oonkundathana koshifokundnaeki shoNamibian Sun omunashipundi gwoKavango East Regional Youth Forum, Anselm Marungu oshinima tashi etitha ohenda ngele gumwe ota tindi kutya ondoolopa ndjoka inayi nyata.

Marungu okwa popi kutya sho omwaalu gwaakwashigwana mondoolopa ndjoka tagu londo pombanda, onyata ndjoka nayo okwa tegelelwa yi ye pombanda onkene okwa pumbwa okuningwa sha meendelelo.

Okwa popi kutya ondoolopa yaRundu oyi na aakwashigwana ya thika po 90 000 nomwaalu ngoka onkene tagu londo pombanda omathimbo nomathimbo. Omayakulo ge na sha nekuthepo lyiiyekelwahi mondoolopa ndjoka kage na ongushu yasha onkene ngele itaku ningwa sha meendelelo onkalo ndjoka otayi ka nayipala nayi noonkondo.

Marungu okwa tsikile kutya onkalo yuupyakadhi wopaliko ndjoka ya dhidhilikwa omolwa ondoolopa ndjoka ya nyata oya pumbwa okukandulwa po meendelelo. Okwa popi kutya omwaalu gwaatalelipo mondoolopa ogwa shuna evi naashoka otashi etithwa konyata yondoolopa ndjoka. Ondoolopa yaRundu ndjoka yi li oshilandopangelo shoshitopolwa shaKavango East oya kala ehala hali nana aatalelipo, molwaashoka oyi li popepi nomulonga, ngoka gwa kala hagu nana aayenda, ihe Marungu okwa popi kutya shoka kashi po we.



“Shoka oshi li omukundu omunene kaapunguli yetu mboka ngashiingeyi ya gumwa konkalo ndjoka yopaliko. Ope na eshuno pevi momwaalu gwaatalelipo mondoolopa omolwa onkalo ndjoka.”

Sho oyendji taya tala owala kombinga ombwiinayi yonkalo yiiyagaya mondoolopa ndjoka, Marungu okwa popi kutya ndjoka onkalo woo yokutotapo oompito dhiilonga, ngele aantu oya longitha ompito yokulongulula iiyagaya.

Oshiwike sha piti, ngoka ta longo pehala lyOmunambelewa omukuluntu mondoolopa ndjoka, Sikongo Haihambo okwa li a popi kutya ondoolopa oya taalela uupyakadhi wopashimaliwa, sho iiyemo yawo oyindji ya thika poomiliyona 60 tayi longithwa mokufuta omukuli ngoka ye na koNamWater.