Ondjila yomamanya otayi pula oomiliyona 36

Ondjila ndjoka oya li yi na okutungwa kongushu yoomiliyona 21 oomvula ntano dha piti, ihe ehangano lyoRoads Contractor Company (RCC), olya ndopa okutameka iilonga yopoloyeka ndjoka.Omupopiliko gwoRA, Hileni Fillemon okwa lombwele oNamibian Sun kutya eindilo lyawo lyiifuta ya gwedhwa po kopoloyeka ndjoka olya taambiwa ko na otaya ka tameka niilonga mbyoka yondjila yoshinano shookilometa 41.Fillemon okwa popi kutya RCC okwa futwa owala omolwa iilonga mbyoka a longa po ihe ina popya kutya moshimaliwa shoomiliyona 21 okwa futwa mo ingapi. “Ehangano lyoRA oshowo uuministeli wiilonga nomalweendo okupitila melelo lyoshitopolwa shaMusati olya gandja otendela yiilonga mbyoka koRCC muNovemba gwomvula yo 2013, ihe RCC okwe shi pondola owala okuteta iihwa etata lyoshinano shoka tashi tungwa ondjila,” Fillemon a popi.Okwa gwedha po kutya RA okwa kutha oonkondo okondalaka ndjoka yali pokati kawo noRCC mopoloyeka ndjoka omolwa endopo okugwanitha po iilonga niilongitho yawo oya kuthwa po kehala lyiilonga.Sho oNamibian Sun ya talele po omudhingoloko gwOnamatanga omwedhi gwa zako RCC natango okwa li pehalaa lyiilonga. Sho ya ningilwa omapulaapulo, ngoka ta longo pehala lyomunambelewa omulukuntu gwoRCC, Seth Herunga, ina vula okutya sha.Kansela gwoshikandjohogololo shaRuacana, Andreas Shintama, okwa popi kutya RCC okwa kala owala pehala ndyoka lyiilonga nonando iilonga oya kala ya thikama okutameka omvula yo 2014.Shintama okwa popi kutya okwa shangela uuministeli womalweendo oombaapila iikando yontumba ta pula opo opoloyeka ndjoka yi manithwe.Okwa popi kutya eyamukulo lya hugunina ndyoka a mono okuza kuuministeli otali ti kutya otawu tala kemanitho lyopoloyeka ndyoka.“Ondjila ndjoka ombwiinayi noonkondo mokati komvula na oya pumbwa okulongwa meendelelo. Ope na aanangeshefa oyendji mboka ya holola ohokwe mokuyambulapo Onamatanga ihe omolwa onkalo yondjila ndjoka itaya vulu okupula komeho.”Kansela okwa popi kutya oshidhigu woo okufala omayakulo gepangelo omolwa ondjila ndjoka ta gwedha po kutya oshinima oshiwanawa sho RA a tokola okulonga ondjila ndjoka.Ominista nale yomalweendo Erkki Nghimtina, okwa tula miilonga iilonga yetungo lyondjila ndjoka momvula yo 2013.“Otwa li tu wete twa pepelelwa sho tatu mono ondjila yomamanya ihe ngashiingey katu shi kutya oshike sha ningwapo. Otu na iipotha oyindji yaakwashigwana taya hulitha nenge otaya pulumuthile uunona mondjila okuya koshipangelo omolwa onkalo yondjila,” Omukuluntuskola poskola yopevi yaNamatanga, Johannes Shaanika, a lombwele oNamibian Sun.“Otu na okaklinika ihe ohashi kutha oambulansa okuza koshipangelo shaKahao olule opo yi thike kutse nopethimbo lyomvula oambulansa ihayi thiki ko kutse.”Onamatanga otayi adhika oshinano shookilometa 120 okuya mondoolopa yaKahao.Shaanika okwa holola okuuva nayi kwe omolwa iiputudhilo mbyoka RA oshowo RCC) sho kayi nako nasha nuuwanawa waakwashigwana.Okwa gwedha po kutya kOnamatanga ohaku yiwa owala ngashiingeyi niihauto mbyoka inene nondjla ndjoka oya nika oshiponga okuhinga na odhigu.Shaanika okwa tsikile kutya nonando okwa shanga oombaapila odhindji ta pula kombinga yondjila ndjoka, ina mona omayamukulo. “Oomvula ne monena na ka tu shi kutya omolwashike iilonga inayi tameka natango. Ondjila ndjoka oya simana noonkondo kaakalimo yomOnamatanga,” Shaanika a popi.ILENI NANDJATO

Ondjila yomamanya otayi pula oomiliyona 36

Comments

Namibian Sun 2025-07-01

Please login to leave a comment

Ondjila yomamanya otayi pula oomiliyona 36

Comments

Namibian Sun 2025-07-01

Please login to leave a comment

Login