Ondjala tayi dhenge aantu niinamwenyo moKunene

Aakalimo oyendji moshitopolwa shaKunene oya mbombolokele koombelewa dhelelo lyoshitopolwa shoka, taya kongo omakwatho goondya dhawo yene oshowo dhiinamwenyo yawo sho oshitopolwa shoka sha taalela ondjala onene. Ngoloneya gwoshitopolwa Marius Sheya okwa gandja omayele kaanafaalama opo ya landithe po iimuna yawo yimwe yo ya vule okuhupa omolwa oshikukuta shoka tashi tsikile. Moonkundathana ndhoka a ningwa naye koshifokundaneki shoNamibian Sun, Sheya okwa popi kutya omvula inayi loka moshitopolwa shoka, nonkalo ndjoka oya e ta omalimbililo mokati kaaniimuna naanamapya.Okwa popi kutya inaya adhika natango konkalo moka iimuna tayi si ihe sho aanafaalama ya nyenyeta oya yi moshigwana opo ya ka tale onkalo, ihe onkalo otayi ulike kutya oya nayipala noonkondo. Okwa gandja omayele kaanafaalama opo ya lundulule omikalo dhuunafaalama wawo okuza kuunafaalama wonale nokutala woo komikalo dhimwe dhanangashiingeyi dhuunafaalama, ngaashi okuya muunamapya nokuninga ikunino yo ya vule okwiimonena oondya. Okwa popi kutya momidhingoloko ngaashi Sesfontein oshowo Fransfontein oye na mo oondama dhomevi odhindji onkene otaya vulu okutameka iiikunino nokwiihupitha okuza koshikukuta. Okwa pula woo aanafaalama ya landithe po iimuna yawo yo ya vule okwiimonena iiyemo nokukala woo nomwaalu omushona gwiimuna.Okwa popi kutya elelo lyoshitopolwa otali pangele okuya moonkundathana nomuprima opo ya tale kutya onkalo ndjoka otayi yi wa ngiini moshipala.Sheya okwa tsikile kutya oprograma yombaanga yiikulya oya kala tayi sile oshisho aakwashigwana moondoolopa ngaashi Opuwo naKhorixas ihe pondje yoondoolopa ndhoka, oshigwana otashi si ondjala noonkondo nokumona iihuna.“Aakwashigwana otaya si ondjala noonkondo na oya pumbwa oondya meendelelo. Molwaashoka aantu yetu oya tala owala kuunafaalama wiimuna na ihaya longo oondya, egandjo lyoondya dhoshikukuta ku yo olyo owala ekandulepo lyomukundu.” Ngoloneya owa tsikile kutya aakwashigwana oyendji oya talele po oombelewa dhoshitopolwa taya kongo omakwatho goondya, ta gwedha po kutya oya pumbwa moshitopolwa shawo opoloyeka yokugongela omeya gomvula, molwaashoka ohaya mono omuloka omwaanawa ihe omeya ngoka ohaga kala po owala uule woomwedhi ooshona, nokonima oya taalela natango ompumbwe yomeya unene yiimuna yawo.ILENI NANDJATO

Ondjala tayi dhenge aantu niinamwenyo moKunene

Comments

Namibian Sun 2025-06-18

Please login to leave a comment

Ondjala tayi dhenge aantu niinamwenyo moKunene

Comments

Namibian Sun 2025-06-18

Please login to leave a comment

Login