Omwaalu gwaatamanekwa moFishrot tagu londo pombanda

Omanga aatamanekwa yotango moshipotha shelyenge lyefuto lyoombumbo mepingakanitho lyookota dhokukwata oohi ya tegelelwa esiku li thikane ya pataneke etulo lyawo miipandeko mOmpangu yoPombandeelela moshilongo, omulumentu ngoka a kambadhala okufuta ombumbo omunambelewa gwoAnti-Corruption Commission (ACC) okwe ya wayimine mongali.Jason Iiyambo ota tamanekwa kutya okwa kambadhala okufuta omunambelewa gwoACC oshimaliwa sha thika pooN$250 000 opo omunambelewa ngoka a gandje uukatala wombaanga womukomeho nale gwoInvestec, James Hatuikulipi oshowo waPius Mwatelulo. Ayehe Hatuikulipi naMwatelulo oyeli oshitopolwa shaalumentu yahamano mboka ya tulwa miipandeko omolwa oshipotha shoFishrot. Iiyambo ota tamanekelwa oshipotha shonkambadhala yokuya moshipala iilonga yuuyuki. Mangestrata Linus Samunzala okwa tindile Iiyambo omboloha pethimbo a holoka momeho yompangu yamangestrata gwaVenduka, mEtitatu. Omufali gwiihokolola kompangu, Tatelo Lusepani okwa tindi egandjo lyomboloha netompelo kutya itashi kala muuwanawa wuuyuki opo Iiyambo a mangululwe molwaashoka otashi vulika a ka kambadhale natango okuya moshipala omakonaakono moshipotha shoka. Oshipotha she osha undulilwa komasiku 20 gaFebruali, hoka aatamanekwa yahamano nayo taya ka holoka mompangu, ihe ye otaka holoka mompangu oye awike.Hahende gwe, Mervin Katuvesirauina, okwa holola kutya otaya ka ninga eindilo lyomboloha. Omukomeho gwoAnti-Corruption Commission (ACC) Paulus Noa okwa lombwele oNamibia Sun mEtiyali, kutya omunambelewa omukonaakoni gwokakomisi okwa li a lombwelwa ta pewa oshimaliwa okuza komayalulo gombaanga ga gumwe gwomaafelelwa mboka ye li mondjeedhililo omolwa oshipotha shelyenge lyefuto lyoombumbo moshikondo shoohi, mepingakanitho nuukalata wombaanga.“Otwa tula miipandeko omuntu gumwe onguloshi yOmaandaha sho a kambadhala okugandja ombumbo komunambelewa omukonaakoni, opo omunambeelwa ngoka a kuthemo uukalata woombaanga wa gumwe gwomaafekelewa moombelelwa dhetu,” Noa a popi. Uukatala wombaanga waafelelwa mboka owa kwatwako onga oshitopolwa shomakonaakono ngoka taga ningwa moshipotha shoka.Oominista nale Sacky Shanghala oshowo Bernardt Esau, Hatuikulipi, menindjela nale mehangano lyoInvestec, Ricardo Gustavo, oshitenya shaEsau, Tamson Hatuikulipi oshowo omuniilonga gwehangano Hanganeni, Pius Mwatelulo oyeli oshitopolwa shaamboka taku popiwa ya pewa oshimaliwa shoombumbo sha thika poomiliyona 150 kehangano lyoSamherji, mepingakanitho lyookota dhokukwata oohi shepangelo.Oshifokundaneki shoNamibian Sun osha lopota oshiwike sha piti kutya, Nigel van Wyk, ngoka a taalela iipotha iyali ye yo moshipala iilonga yuuyuki moonkambadhala dhokuholeka uumbangi okuza megumbo lyaShanghala, okwa ndopa okuya komeho neindilo lye lyomboloha. Van Wyk okwiinekelwa kutya omuniilonga gwehangano Olea Investments, ehangano lyaShanghala. Olea otaku popiwa a yakula oshimaliwa shooUS$330 000 moombumbo okuza kuSamherji.Aatamanekwa yotango yahamano moshipotha shoFishrot oyeli yeedhililwa moWindhoek Central Correctional Facility sigo osho taya holoka mompangu momasiku 20 gaFebruali, ihe sho oshipotha shawo sheekelwahi mOmpangu yoPombanda moka taya pula opo etulo lyawo miipandeko li kuthwe oonkondo, mboka natango oya ningi eindilo mompangu yoPombandeelela opo oshipotha shoka taya tamanekelwa shi ekelwehi.Omvula ya piti, ehangano lyoLaw Society of Namibia olya koleke kutya otali ningile omakonaakono omayalulo gombaanga gehangano lyahahende Sisa Namandje, sha landula ehololo lya ningwa monkundana tayi ithanwa 'Fishrot' documentary, ndjoka ya pitithwa koshikundaneki shoAl Jazeera 'Fishrot'. Omayalulo gombaanga yehangano lyaNamandje otaku fofodholwa kwa pitile oshimaliwa sha thika oomiliyona 17.5 okuza kehangano lyepangelo lyoFishcor. Natango otaku ningilwa omakonaakoo hahende gwomondoolopa yaMbaye, Sacky Kadhila Amoomo, ngoka taku popiwa aniwa kutya okwa dhana onkandangala onga omupitithi pokati kaanangeshefa aazaizai naEsau. Shoka osha landula oondokumende omayovi dhoka dha ulike kutya Samherji okwa gandja oombumbo dha thika poomiliyona 150 mepingakanitho lyookota dhokukwata oohi. Omanga ya tseyitha eikutho lyawo miilonga moNamibia, Omukomeho gwehangano ndyoka lyoSamherji, Björgólfur Jóhannsson okwa ndopa okugandja kutya otaya thigipo Namibia uunake. Ngoka ta londo pehala lyominista yoohi, Albert Kawana okwa tseyitha muDecemba kutya aaniilonga mboka ya kanitha iilonga yawo sha landula sho omwaalu gwookota dhokukwata oohi dhehangano lyoNamsov gwa shunithwa pevi pethimbo lyelelo lyaEsau, otaya shunwa miilonga. Kawana okwa popi kutya okwa pewa elombwelo kOkabinete opo a kwashilipaleke kutya ayehe mboka ya kanitha iilonga yawo oya mona iilonga. “Aaniilonga ayehe mboka naya shune miilonga, naandika elombwelo lya gandjwa kOmupresidende Hage Geingob. Oya mona iihuna ethimbo ele pamwe noofamili dhawo nethimbo olya thikana opo ya vule ishewe okutula omboloto poshitaafula.” Kawana okwa popi kutya naaniilonga mboka ya kanitha iilonga yawo onga oshizemo shekanka lyaali paveta ndyoka ya ningi otaya ka pewa iilonga molwaashoka kehe gumwe omuntu na ita vulu okugeelwa onkalamwenyo ye ayihe omolwa omapuko e ga ningi.“Kape na omuntu moNamibia a pumbwa okukala a sa ondjala nenge e li moluhepo noonzo dhoshilongo shika odha pumbwa okugandja uuwanawa kAaNamibia ayehe.”Kawana okwa popi kutya nonando oshipotha shoFishrot osha geyitha oyendji, kehe gumwe na ethe ompango yi holole oshizemo sha hugunina.Osha lopotwa kutya ekanitho lyiilonga moshikondo shoohi muule woomvula dha piti, olya etithwa kuEsau ngoka a lundululile egandjo lyookota dhokukwata oohi kwaamboka taya kwatakanithwa noshipotha shoFishrot. Kawana okwa popi kutya oshipotha shoka osha geyitha oyendji ihe aantu naya ethe ompango yi ninge etokolo. Otaku popiwa kutya ekanitho lyiilonga moshikondo shoohi osha etithwa kuEsau pamwe nayakwao mboka ya ningi omalunduluko nokugandja ookota dhokukwata oohi kehangano ndyoka lye ya futu oombumbo. Kawana okwa pewa oshinakugwanithwa kOmupresidende Hage Geingob omwedhi gwa piti okutalulula oshikondo shoonzo dhomomeya mokukutha po elongitho nayi lyoonzo, uulingilingi nuukombunda. Okwa pulwa woo a talulule iilonga yuuministeli woohi oshowo ehangano lyoFishcor yuule woomvula omulongo dha piti.

Omwaalu gwaatamanekwa moFishrot tagu londo pombanda

Comments

Namibian Sun 2025-06-18

Please login to leave a comment

Omwaalu gwaatamanekwa moFishrot tagu londo pombanda

Comments

Namibian Sun 2025-06-18

Please login to leave a comment

Login