Omulongiskola a tulwa miipandeko sho a adhika niingangamithi

Omulongiskola poskola yedhina Monica Geingos Junior Secondary School mOtjiwarongo okwa tulwa miipandekosho a adhika niingangamithi yocannabis.

Omukiintu gwoomvula 40 oshowo kuume ke gwoomvula 54 omulumentu oya tulwa miipandeko pegumbo lyawo momudhingoloko gwa Orwetoveni mEtine lyoshiwike sha piti.

Omupipiliko gwopolisi yaTjozondjupa, Maureen Mbeha, okwa popi mOlyomakaya kutya uupakete uwali wu na ocannabis owa adhika wa holekwa mokandjugo kopondje megumb ndyoka.

“Iingangamithi mbyoka oyongushu yooN$18 000,” Mbeha a popi.

Aafekelwa mboka otaya tamenekelwa oshipotha shokukala niingangamithi na okwa li tegelelwa ya holoke mompangulilo yamangestrata gwaTjiwarongo, ohela.

Omakonaakono gopolisi otaga tsikile. Moshipotha sha yooloka, omulumentu gwoomvula 24, okwa tsuwa sigo omeso pondunda yomanwino moMalinda mOlyomakaya ya piti.

Deputy Chief Inspector Simon Muhinda, gwoshikondo shekonaakono lyiimbuluma moshitopolwa shaHardap okwa popi kutya nakusa okwa dhimbululwa kutya oFillipus Sheuyange.

Okwa popi kutya okwa tukuka olugodhi komeho yondunda ndjoka, naalumentu yaali oya tsuwa.

“Sheuyange okwa hulithile pehala lyoshiningwanima omanga omunamimvo 33 Joseph Lazarus e li monkalo ohwepo moshipangelo,” Muhinda a popi.

Kakushiwike kutya oya tsuwa kulye. Aakwanezimo yaSheuyange oya tseyithilwa, nomakonaakono gopolisi otaga tsikile.

Muhinda natango okwa lopota oshipotha shokuhinga nuuhasha omuntu e li kohi yodhungo, shoka sha lopotelwa opolisi yaAranos, konima sho ohauto ya gu nokugalangata lwopotundi onti 23:00, mEtitano momudhingoloko gwoNew Extension.

“Omufekelwa okwa li ta hingi ohauto ontokele yoVolkswagen Polo yi na onomola yaRehoboth nondjele ye yiikolitha oya li ya pitilila noopresenda 0.67. okwa lopotwa a nyengwa okupangela osheenditho na okwiidhenge mopala yolusheno nohauto oya galangata.”

Omuhingi gwohauto ngoka e na owala ombaapila yokwiilonga okuhinga okwa tulwa miipandeko.

mOmbaye omwa lopotwa oshipotha shedhipago lyaashi lyoshiningilawina.

“Lwopotundi onti 20:20 mEtitato, omulumentu gwoomvula 19 ngoka a zi mondunda yomanwino yedhina African Moto bar popepi nepandanda lyaKabeljou okwa pumwa koshiyenditho omanga a li ta kambadhala okutaaguluka opate. Okwa gupo sho a pumbwa kohauto yoToyota Corolla nasho a giwle pevi okwa lyatwa kohauto yoVolkswagen Jetta, ndjoka yemu kokolola oshinano oshishona,” omunambelewa omukwatakanithi gwiimbuluma moshitopolwa shEongo, Erastus Iikuyu a popi.

Omulumentu ngoka okwa hulithile pehala lyoshiponga naahingi yiihauto ayehe yaali oya adhika pehala mpoka kopolisi. Kape na ngoka a tulwa miipandeko.

Aakwanezimo ya nakusa oya tseyithilwa nomakonaaakono gopolisi otaga tsikile.

“Oshinano shookilometa 1 okuya mUsakos, ombesa oya thikama inashi tegelelwa pomunkulo gwondjila, nomuhingi gwombaki ngoka a li a landula ombesa ndjoka okwa kambadhala okuyanda okwiidhenge mu yo ihe okwiidhenge mumwe omutse nomutse nohauto ndjoka yali tayi zi komeho ge. Omulumentu gwoomvula 31, omuhingi oshowo omufaalelwa gwoomvula 45 oyeehamekelwa moshiponga.”

Okwa gwedha po kutya ohauto ontitatu oyiidhenge konima yayimwe yomiiyenditho mbyoka, nomulumentu gwoomvula 32 omuhingi oshowo omufaalela oya ehamekwa.

Oonakweehamekwa ayehe oya falwa moshipangelo shaUsakos. - Olopota yagwedhwapo komutoolinkundana gwetu.



NAMPA