Omukwaita gwepangelo lyokatongotongo a shanga embo

Du Toit ngoka monena ha kala koCongo-Brazzaville na okwa li a kwatele komeho osheendo shoka sha ponyo okukoleka ekalepo lyookamba dhoAfrican National Congress (ANC) oshowo dhoSwapo popepi naCabinda moAngola mo-1985 ,okwa li a kwatwapo na okwa kala a mangwapo uule woomvula mbali netata omanga ina mangululwa mepingakanitho nookwatwa. Du Toit okwa tegelelwa a ka popye moSwakopo pethimbo lyepititho lyembo lye ndyoka tali ithanwa ‘Judasbok’ moka a popi nkene aakwiita aatiligane ya kengelelwa kepangelo lyaSouth Afrika. Gert Jacobie, ngoka a kwatakanithwa noshituthi shoka konima sho a tumbulwa komushangwa gwaDu Toit gwokoFacebook ohela okwa popi kutya kape na uuwinayi washa meyo lyaDu Toit moNamibia. Momushangwa gwokoFacebook ngoka gwa shangwa kuDu Toit ogwa popi kutya ote ya okupopya naa“Suidwesters”. Sho a pulwa kutya aantu mboka oyeni, Jacobine okwa yamukula kutya:”Ngaaka osho ho ula aantu mboka haya zi moshitopolwa shomUumbugantu-Uninginino waAfrika. Kape na uuwinayi washa nenge pamwe ongundu yomeholamo ngaashi wa hala okufekela mpaka.” “Ondi na ontseyo oyindji mwaashoka to longo [omutoolinkundana], ino kambadhala oku etapo iinima mbyoka yaahepo. Owuli konima nehokololo ndika nuule woshiwike shimwe ihe monena oto dhengelendje wa hala okutota po iinima mbyoka yaahepo.” Okwa tsikile kutya: “Ote ya okushaina embo lye nokonima ope na oshinima oshiwanawa sha longekidhwa kaantu yamwe mongulohi ndjoka. Ngele owa hala oto vulu okuya ihe owuna okufuta oshimaliwa shooN$300 opo wu ye meni.” Miipathi yaKaptain nale gwEtanga lyAakwiita yaSouth Afrika, etseyitho ndyoka inali taambiwako nawa kuKomanda-Ndjai Raonga Andima ngoka e li omukomeho gwoNamibia National Liberation Veterans Association. Andima okwa li okomanda yoPLAN. “Oshinima shika otashi keeta omadhilaadhilo omawinayi. Ngeno okwa li ongame andola inandi mu pitika e ye moshilongo nokupopya naantu. Pethimbo lyemanguluko epangelo olya tulwa miilonga omulandu gwedhiminathanepo nomulandu ngoka ogwo tagu mu pitika ihe ngame itandi kiikwatathanitha naye nenge nembo lye,” Andima ta ti. Ominista yOshikondo shOpolisi, na okwa li nale okomanda yoPLAN Charles Namoloh, okwa popi kutya Du Toit okwa manguluka okuya moshilongo mombepo yedhiminathanepo lyopashigwana. “Haye omuntu gwotango ta ningi ngaaka. Pemanguluko otwa uvuko kutya otwali tatu kondjitha omulandu gwepangelo na ka twali tatu kondjitha oohandimwe. Monena otwa dhiminathanapo na otatu pula komeho. Ondiinekela kutya ote ya huka opo a popye kombinga yiinima iiwinayi mbyoka ya ningi na ota kongo edhinimepo okuza kaantu mboka ya ehameke, kape na uupyakadhi mpoka,” Namoloh ta ti. Namoloh okwa tsikile kutya omuyelo ogwa eguluka opo ayehe mboka ya longo omiyonena pethimbo ndyoka na oya hala okudhiminwa po ye shi ninge. “Ondi wete kutya oyendji inaya hala okusa inaya dhiminwapo onkene shoka osho tashi ya thiminike opo ya konge edhiminepo.” Amushanga-Ndjai gwOngundu yoSwapo, Nangolo Mbumba okwa li apopi aniwa kutya epangelo oshowo oofamili dhaamboka ya hulihile mekondjelomanguluko otaya kongo omayamukulo okuza kuDu Toit. “Otatu kongo omayamukulo. Otwa uvu kutya ope na aantu yetu yamwe mboka ya umbilwa mefuta, otwahala okuuva nawa kombinga yiinima mbyoka,” Mbumba ta ti. ELVIS MURARANGANDA