Omukomeho gwoNSFAF a kuthwa miilonga

Ekutho miilonga ndyoka olya tseyithwa mOmaandaha.

Mutumba okwa popi kutya elelo lyoshiketha otali ka manitha okutongolola iipotha mbyoka tayi tamanekelwa Nghiwete, muule womasiku 14.

Patseyitho ndyoka lya ningwa koNSFAF, ekutho miilonga olya etithwa komalundilo omanene. Omalundilo ngoka oga kwatela mo uulingilingi nelongitho lyiiyemo yoshiketha pambambo.

Momukanda ngoka gwa pitithwa kuMutumba, etokolo lyokukutha miilonga Nghiwete, olya ningwa momutumba gwelelo, ngoka gwa ningwa momasiku 9 gaApilili. Nghiwete otaka futwa ondajmbi ye yuudha ihe okwa kuthwa oonkondo adhihe dhiilonga onga omukomeho gwoshiketha shoka.

Mutumba okwa tsikile kutya ekutho miilonga lyaNghiwete itali ka guma nando okashona iilonga yoshiketha shoka.

Menindjera gwopombanda moNSFAF,

Kennedy Kandume oye ta longo pehala lyaNghiwete, onga omunambelewa omukuluntu gwoshiketha shoka. Nghiwete ina vula okumonika opo a popye sha kekutho miilonga lye. Mutumba okwa popi kutya kape na omuniilonga gumwe, akuthwa miilonga shi na sha nomatompelo ngoka ga kuthitha Nghiwete miilonga.

Okwa tsikile kutya Kandume okwa hogololwa opo a longe pehala ndyoka, molwaashoka oku li omuniilonga a longela oshiketha shoka ethimbo, nopoompito woo dhelelo lyoshiketha shoka uule woomvula ne.

NSFAF okwa kala ta dhana onkandangala miikundaneki uule womathimbo ga piti, nomatompelo ga puka. Oshiketha shoka osha ndopa woo okuholoka komesho yoParliamentary Standing Committee on Public Accounts omvula ya piti, nelelo lyoshiketha olya holoka komeho yokomitiye ndjoka muMaalitsa gwomvula ndjika. Pethimbo mbyoka ya holoka komeho yokomitiye, oya ningilwa omapulo omolwa iimaliwa yoobiliyona 1.7 yoshiketha shoka, mbyoka ya nuninwa omailongo gaayakulwa yoshiketha, kaku shiwike kutya oya longo shike.

Pethimbo lyomutumba nokomitiye yoPaliamende, NSFAF okwa popi kutya ota vulu okumona mpoka wa yi oobiliyona 1.5, na okwa popi kutya okwa yi metsokumwe nehangano lyoNamibian company Tribesmen oshowo lyaSouth Afrika lyoNew Integrated Credit Solutions (NICS) opo ya vule okumonako iimaliwa mbyoka inayi futwa natango koonakupewa omikuli dhokwiilongitha.

Epangelo otali ningi oompangela dhokushunitha oshiketha shoka mepangelo, kUuministeli wElongo lyoPombanda nOmadheulo. Etseyitho ndyoka olya li lya ningwa oshikando shotango kOminista yOshikondo shoka,

Itah Kandjii-Murangi omvula ya piti, pethimbo lyomutumba ngoka gwa ningwa niikundaneki.

Momvula yo 2016 Okakomisi koAnti-Corruption oshowo Uuministeli wIiputudhilo yEpangelo, owa pulwa ya konaakone iilonga yokakomisi hoka.

NSFAF okwa totwa po muJanuari gwo 1997, nelalakano lyokugandja omikuli nomayambidhidho gokwiilonga kaailongi AaNamibia.





CATHERINE SASMAN