Omukokele a tulwa mokatoo

TUYEIMO HAIDULA OSHAKATIOmukokele gwoomvula 60, omulongiskola e li moshipundi shevululuko okwa kanitha oshimaliwa shooN$50 000 koongangala dhoka dhemukengele onga aanambelewa yopolisi.Omulumentu ngoka okwa hokololwa a yi a ka lande iitungithi ye kostola yiitungithi mOmaandaha nomukiintu ngoka iitumbula kutya oye Martha okwa yi kuye ta popi kutya okwa li omulongwa gwe mosekundoskola Oshakati Secondary School.Omunambelewa omupopiliko gwopolisi yaShana, Thomas Aiyambo okwa popi kutya omukokele ngoka okwa pula omukadhona ngoka e mu tumine ethano koWhatsApp, ihe okwa tindi.Aiyambo okwa popi kutya Martha okwa pula omusamane ngoka opo e mu yambidhidhe a fale oosamende dhe kOkatana konyala ookilometa ne okuza mOshakati.Sho mboka yaali ya thiki mOkatana, Martha okwa ninguluka na okwa pula opo oosamende dhi falwe komukunda Amutanga, natango oshinano shookilometa ne okuza mOkatana okuza mondjila onene.Okwa popi kutya omusamane ngoka okwa tindi sho a nongele uulingilingi.“Omusamane okwa thikama pomahooli gopOkatana na okwa pula a helulemo oosamende dhe,” Aiyambo a popi.Omukiintu ngoka okwa zimo mehauto na okwa dhigi mo ondjato ye yopeke.Konima yokathimbo aalumentu yaheyali oye ya pomahooli mpoka taya popi kutya yo aanambelewa yopolisi na oya pula omusamane a ze mo mehauto opo ya hadhe ehauto ndyoka.Aiyambo okwa popi kutya yaali yomaalumentu mboka yaheyali oya li ye na oombaapila dhiilonga yaapolisi dhiikengelela oshowo uundjatha mboka hawu zalwa kaapolisi.“Oya pula ngele omusamane ngoka oku na ondjembo na okwa ti ahowe na oye mu hadha. Pethimbo ndyoka Martha okwa ambadhala okwiilamo ondjato ye mohauto ihe opolisi oya tindi na oya hadha ondjato na oya a dha mo ooniga dhoompanda dhiikengelela.”Sho aafekelwa mboka ya lombwele omukokele ngoka kutya ota tulwa miipandeko sho aadhiha a humbata ooniga dhoompanda, okwa pula a fute oshimaliwa shooN$50 000 opo a mangululwe.“Okwa yi na okwa ka nana iimaliwa na okwe yi pe aafakelwa mboka ye mu pula opo a ye kOmpumbu hoka ya tambulile iimaliwa mbyoka na oye yi yalula na oya shendje omizalo dhawo na oya pula omusamane ngoka a ye,” Aiyambo a popi.Aiyambo okwa kunkilile aakalimo yomOshana kutya oongangala otadhi longitha oondjila ngaashi Adolf–Ongha, Onamutayi-Ongha, Oshakati-Okatana oshowo Ongwediva nomikunda dhopuushiinda ngaashi Ekolyanaambo, Oikango, Omahenene-A, Onamutayi, Okaandje oshowo Omhangela.Okwa gwedhapo kutya kehe ngoka ta ningi oshihakanwa shiikengelela mbyoka ina tila okutulwa miipandeko molwaashoka kaye na shoka ya pogola. Okwa pula woo oshigwana shi ikaleke kokule nokufuta oombumbo.Gumwe gwomaafekelwa mboka okwa tulilwa miipandeko mOngwediva mEtiyali adho a li takambadhala okutula mokatoo natango omukokele gumwe momukunda Eenghala.Aiyambo okwa popi kutya omunamimvo 55 okwa ningilwa omatilitho kaafekelwa ya heshiwike na ye mu thiminike a nane iimaliwa.“Nakuninga oshihakanwa okwa dhengele aanona ye mboka ya dhengele opolisi na oya yamukula meendelelo. Aafekelwa oya yi ontuku nohauto yotaxi yonomola yoN 17131N D,” Aiyambo a popi.Omufekelwa ngoka okwa tegelelwa aholoke mompangu oshiwike shika.Aiyambo okwa popi kutya oongangala otadhi tala unene kaakokele mboka opo ya penzelwa nenge ye li pokupenzelwa.

Omukokele a tulwa mokatoo

Comments

Namibian Sun 2025-07-03

Please login to leave a comment

Omukokele a tulwa mokatoo

Comments

Namibian Sun 2025-07-03

Please login to leave a comment

Login