Omukiintu a hupu meponokelo lyondjambameya

Omukiintu omunamimvo 29 e li metegelelo gwomomukunda Rugcuva moKavango West okuli ta ti po hwepo moshipangelo shaRundu, konima sho a hupu moshiponga, sho a ponokelwa kondjambameya.

Oshiponokela shoka osha ningwa ongula yOmaandaha momulonga gwaKavango momukunda gwawo, sho ondjambameya ya ponokele Christine Ndumba, nokumweehameka mokwaako oshowo okumuninga oshilalo mongolo. Ndumba okuli metegelelo lyoomwedhi heyali.

Sho a popi okuzilila mombete ye yuuwehame moshipangelo, Ndumba okwa hokolola kutya okwa ponokelwa kondjambameya.

“Ondali nda yi komulonga opo ndi ka tekele oshikunino shetu shoka shi li pooha dhomulonga. Konima onda yi opo ndi ka tule po omwigo gwetu gwoohi momulonga. Sho nda galukile moshikunino ondjambameya oya ponokelendje okuza konima. Oya ehamekendje mokwaako kokolumoho oshowo mongolo yokolumoho nokuya ontuku momeya,” Ndumba a popi.

Okwa popi kutya konima yoshiponokela okwa kugu opo a mone ekwatho nomusamane gwe okwe ya e mukwathele.

Omusamane gwe pamwe naanamukunda yalwe yatatu oye mu humbata nokumufala pokaklinika kopopepi hoka a tumimwa moshipangelo shepangelo moRundu.

Omupangi moshipangelo okwa popi kutya etegelelo lyaNdumba inali gumwa, sho okanona ke keli nawa naye mwene okuli monkalo ohwepo.

Ndumba okwa holola kutya ondjambameya oya kala nokweetitha uupyakadhi momukunda gwawo, mwakwatelwa okuponokela iimuna.

Olopota yopolisi moKavango West oya holola kutya, aanamukunda oya popi kutya ondjambameya ndjoka oya nika uuhwapindi onga oshizemo sheponokelo tayi ningilwa kiinamwenyo yilwe.

KENYA KAMBOWE