Omukiintu a dhipagwa pamwe nomona moRundu

Omukiintu pamwe nokamonamati koomvula 6 oya hahalwa sigo omeso, sha ningilwa momukunda Masivi mUumbugantu waRundu mOshitopolwa shaKavango West onguloshi yOmaandaha. Oshiningwanima shoka oshinyanyalithi, osha monika ongula yEtiyali sho omudhimba gwomukiintu ngoka pamwe nomudhimba gwokamona gwiitsuwa mondunda yawo yokulala pondingosho mpoka ha pu longele omukiintu ngoka. Omukonaakoni gwIimbuluma moshitopolwa shoka Chrispin Mubebo okwati, omudhimba gwomukiintu ngoka ogwa adhika gwa lala pevi pooha nombete omanga omudhimba gwokanona gwaadhika kombete. Mubebo okwati, omweelo gwondunda ndjoka yokulala ogwa tewa po. Oonakusa mboka yaali oya tetagulwa noshilwitho shopamuthigululwakalo. Oshiningwanima shoka osha nana aatali oyendji mwakwatelwa aanaskola yopOskola yoPevi yaMasivi. Aanona yoskola okwa lopotwa yali ya kumwa noonkondo mokumona oshiningwanima shoka oshitilithi sheetitha omukuluntuskola ndjoka a kaleke ootundi poskola ndjoka. Omukiintu ngoka okwa tumbulwa kedhina kutya oLaurensia Musigeni, 35, nokamona oka tumbulwa kutya oThomas Samwere ayehe aakalimo yomomukunda Masivi. Aakwanezimo yoonakusa oya tseyithilwa omaso ngoka. Otaku tengenekwa kutya omadhipago ngoka oga ningwa komunamimvo 18, omunaskola gwomondondo onti-7 pOskola yoPevi yaMusavi ihe omufekelwa ina tulwa natango miipandeko nopolisi otayi pula aakwashigwana mboka ye na uuyelele ya gandje uuyelele mboka kopolisi. MASIVI NAMPA