Omukiintu a dhipagwa mOmusati

Omiyonena dhomomagumbo oshowo omadhipago ngoka taga ningilwa aakiintu unene kaalumentu mboka yeli nayo nenge yali nayo momakwatathano gopaihole otadhi tsikile nokukenyeneka oshigwana nokudhiga omapulo ogendji gaana omayamukulo mokati kaakwashigwana. Omukiintu gwoomvula dhopokati okwa lopotwa a kutulwa omunino komusamane gwe nale sha ningilwa momukunda Oshuundje mOshitopolwa shamusati, Osoondaha yapiti. Omupopiliko gwopolisi mOshitopolwa shaMusati, Hesekiel Hamalwa okwa popi kutya omutamanekelwa ngoka e li omunamimvo 39, okwa yi kegumbo lyayina yomukulukadhi gwe nale hoka nakusa a li a kala konima sho ya teya ondjokana yawo. Sho a yi megumbo moka, omutamakelwa okwa yi uuka kondunda yokulala yaNangula Yelukeni Haikela. Omufekelwa otaku hokololwa a zi mo megumbo moka lyopotundi onti-19 na ina holola omalimbililo gasha na okwa yi kegumbo hoka a li ta tungu. Olutu lwaHaikela olwa ka monika owala kokanona koomvula 14 hoka haka zi maandjawo. "Kape na ngoka e li megumbo uuvu taya tamanana nenge pamwe oonkugo okuza kondunda ndjoka, otatu fekele kutya okwemu kwata komulungu nokumu kutula omuligu," Hamalwa ta ti. Hamalwa okwa popi kutya konima sho ya pewa olopota ndjoka opolisi oya endelele nokuya kegumbo hoka kwali taku longo omulumentu ngoka na oyemu adha a holama pombanda yetungo. Aahokanathani mboka nale oye na uunona uwali mboka wali kegumbo lyaahokanathani mboka nale momukunda Omutundungu mOkalongo pethimbo yina adhipagwa. Hamalwa okwa popi kutya inaya tseya natango kutya mboka oya kala mondjokana oomvula ngapi ihe oya nongele kutya opo ya teya ondjokana yawo. Aakonaakoni otaya ningi omakonaakono okumona ngele ope na omanyenyeto gomamonitho giihuna okuza komutamanekwa pethimbo ya kala mondjokana yawo. MERJA IILEKA