Omukiina Omuchina a zimine ondjo

Gumwe gwomAakiina mboka ya tulwa miipandeko sho ya kambadhala okuyakela ooniga dhoompanda pondje yoshilongo, dhoka kwa hololwa kutya odhina ongushu yoomiliyona 2 okwa zimine ondjo moshipotha shoka ta tamanekelwa na okwa popi kutya yakwawo yalwe yatatu kaye na mo ondjo moshipotha shoka. Li Zhibing okwa zimine kutya oku na ondjo moshipotha shonkambadhala yokuyakela pondje yoshilongo ooniga dhoompanda oshowo oshipa shetotongwe. Ota tamanekelwa woo oshipotha shokulakala niitopolwa yiiyamakuti shaali paveta, okukala niitopolwa yiinamwenyo ya gamenwa oshowo oshipotha shekengelelo neholeko lyoonzo yiimaliwa. Oonakutamanekwa pamwe naye Li Xiaoliang, Pu Xuexin naWang Hui, oya popi kutya ka ye na ondjo. Xiaoliang, Zhibing naXuexin oya tulilwa miipandeko pOkapale kaHosea Kutako International momasiku 24 gaMaalitsa sho momitsalo dhawo mwa adhika nooniga dhoompanda dhili 14 dhongishu yoomiliyona 2.3 oshowo oshipa shetotongwe shongushu yooN$50 000. Hui okwa tulwa miipandeko konima na okwa hololwa kutya oye shikwetepo melyenge ndyoka. Zhibing momukanda gwehokololo lye ngoka gwa leshwa mompangu okwa popi kutya okweya moNamibia momasiku 12 gaMaalitsa mo-2014 onga omutalelipo nota kongo oompito dhomapungulo mongeshefa ye moshikondo shomatungo. Okwa li e na okushuna momasiku 24 gaMei ihe momasiku 23 omanga a li po- Windhoek Country Club Resort and Casino okwa taamba uutaasi uwali wa kuume ke okuza kuunona Wu Zhong, ngoka e li moZambia. “Wu Zhong onde mu tseya omanga twa li aanona, otwa za mondoolopa yimwe moJiansu moChina.” Zhibing okwa popi kutya uutasi mboka owali wa patwa na Zhong okwe mu pula opo e wufaalele koChina molwaashoka ye okwa li iipyakidhila koZambia. Zhong okwa lombwele Zhibing kutys muutasi mboka omu na ooniga dhoompanda, oshipa shetotongwe niikutu, na okwa uvaneke kutya oteke mu futa oo US$3 000 uuna a thikitha uutasi mboka koChina. “Omolwa okahalu kiimaliwa mbyoka nda uvanekelwa, onda taamba uutasi mboka.” Pahapu dhaZhibing sho a zimine okufaalela uutasi mboka, okwa ithana Xiaoliang opo e mu kwathele mokuhumbata uutaasi mboka molwaashoka owali uudhigu. Anuwa ine mu lombwela sha kombinga yaashoka shili muutaasi mboka nenge oonkundathana dhawo naZhong. Okwa popi kutya aatamanekwa yakwawo kaya li ya tseya shoka shi li muutasi sigo osho wa patululwa kopolisi. Zhibing okwa tsikile kutya momasiku 24 gMei oya yi kokapale natango okwa pula Xiaonliang e mu humbatitheko. Okataasi kamwe oka talwa keli kedhina lyaXiaonling omolwa oondjindikila dhiiviha. “Ondi shi shi kutya onkambadhala yokuyakela ooniga ndhoka noshipa shetotongwe pondje yoshilongo okuza moNamibia oshi li epogolo lyompango. Otandi zimine kutya onda pogola oompango sho nda zimine okufaalela iinima mbyoka koChina omanga kandi na ontseyo kutya Wu Zhong okwa likola ngiini iinima mbyoka.” Omunambelewa gwOpolisi, Willemina Shetuneynga, ngoka ta longele pokapale hoka okwa popi kutya, sho oondjato ndhoka dha konaakonwa okwa ka konga ooyene yoondjato. Okwa pula Xuexin ngele okushi omadhina ngoka ge li koondjato na okwa dhimbulula omadhina gaXiaoliang naZhibing. Oya pulwa opo ya ulike oondjato dhawo nasho yedhi ulike oya pulwa ngele oye shi shoka shi li mo. Xiaoliang okwa ti kutya okushi shoka shi limo, omanga Zhibing a ti eeno na ahowe. Oshipotha shoka osha tsikile ohela.