Omufekelwa medhipago lyomUuvudhiya a tulwa miipandeko
Omufekelwa gwotango moshipotha shedhipago lyomukalimo gwomUuvuthiya, Tulipomwene Magano Emili, okwa tulwa miipandeko konima sho a kala ta kongwa kopolisi uule woshiwike shimwe.
Komanda gwOpolisi yaShana, Komufala Ndahangwapo Kashihakumwa, ohela okwa lombwele oshifokundaneki shoNamibian Sun kutya, omulumentu gwoomvula 22 ngoka taku fekelwa kutya oye a dhipaga Emili, okwa tulwa miipandeko mEtine lyoshiwike sha piti, a tulilwa miipandeko konyala oshinano shookilometa 700 okuza pehala mpoka pwa ningilwa oshimbuluma.
Ngimbihafo Hanemweshitya, a tseyika nedhina Erasto Fessy, okwa tindilwa omboloha pethimbo a holoka komeho yOmpangu yaMangestrata gwaShakati mEtiyali ta tamanekelwa oshipotha shedhipago.
Kashihakumwa okwati, Hanemweshitya okwa tulilwa miipandeko mOvenduka, sha landula sho opolisi ya nothwelwako koshigwana na okwa shunwa kOnooli yoshilongo nokutula mondjeedhililo yaShakati.
Hanemweshitya ota tamanekwa kutya okwa tsu nombele Emili montulo, sha landula oontamanana pokati ke na nakusa ndhoka dha ningilwa pondje yegumbo lyaandja Emili mUuvudhiya mOshitopolwa shaShana.
Omulumentu ngoka a ningilwa omapulaapulo konima sho a holola kutya okwa mono shoka sha ningwa po pethimbo lyoshiningwanima shoka, okwati, okwa kutha Emili momake gomulumentu ngoka konima sho a adha taya kondjo. Emili okwa tondokele mondunda ye nokonima yethimbo mondunda ye omwa zi omulumentu ngoka a popi kutya Emili okwa tsuwa nombele.
“Hanemweshitya okwa popi kutya okwali ta lwitha omulumentu ngoka a adha nomukadhona gwe. Okwati okwa tsu omulumentu ngoka na inatsa omukadhona gwe,†Kashihakumwa ta ti.
Omulumentu keeshiwike ngoka kwa lopotwa a zi mondunda yaEmili esiku ndyoka, ngoka opolisi tayi fekele kutya okwali e li mekwatathano lyopahole naEmili okwa dhimbululwa kutya oAmutenya Petrus.
Petrus gwoomvula 22, okwa tulwa miipandeko konima sho ondjatha ye ya adhika mondunda yaEmili yokulala sha landula eso lye.
Petrus ngoka monena a mangululwa okuza mondholongo, okwali ta tamanekelwa oshipotha shedhipago pethimbo mpoka opolisi yali yiipyakidhila nomakonaakono oshowo olukongo lwa Hanemweshitya.
OSHAKATI MERJA IILEKA
Comments
Namibian Sun
No comments have been left on this article