Omufekelwa a yi ontuku

Omukwashigwana gwaChina, ngoka a tulwa miipandeko muJanuari omolwa okukala nooniga dhoompanda okwa lopotwa a yi ontuku.

Omunamivo 29, Nan Chen okwa li a pewa omboloha yoshimaliwa shooN$300 000, na okwa li a tegelelwa a holoke komeho yOmpangulilo yaMangestrata gwaVenduka ihe ina holoka mompangu, nomukalelipo gwe gwopaveta, Kadhila Amoomo naye keshi mpoka e li.

Molwaashoka okwa ndopa okuholoka kompangu, okwa gandjwa elombwelo opo a tulwe miipandeko.

Iimaliwa ye mbyoka a futu omboloha oya kuthwa po kepangelo sigo osho ta holoka mompangulilo momasiku ga 5 gaJuli nuumvo.

Ngele natango okwa ndopa okuholoka mompangu, nena otaku ka gwandjwa etokolo lya hugunina opo iimaliwa ye mbyoka yi kuthwe po nokuya moshiketha shepangelo.

Omukonaakoni gwoshipotha shoka Felix Ndikoma, okwa pewa elombwelo opo a kwashilipaleke kutya epeko ndyoka olya pewa ompangu omanga omasiku ga 5 gaJuli inaga thikana.

Ngoka ta tamanekwa pamwe naNan, Yongui Lu, 41, okwa holoka mompangu pamwe nomukalelipo gwe gwopaveta, Mbushandje Ntinda.

Ongushu yooniga ndhoka dha adhika naalumentu mboka okwa lopotwa dhongushu yooN$44 000.

Mboka oya tulilwa miipandeko momudhingoloko gwaEros.

Ongundu yaanambelewa yOpolisi yaNamibia oshowo Opolisi yaVenduka, oya tula miipandeko aalumentu mboka sha landula ehadho lya ningilwa mehala ndyoka haya zi na omwa adhika ooniga ndhoka oshowo ondjembo.

Oshipotha shoka otashi kwatelwa komeho kuMangestrata Vanessa Stanley omanga epangelo tali kalelwa po kuAndreas Joseph.



NAMPA