Omudhipagi gwaFrieda ita monika

Olyomakaya oya li oomvula mbali sho omunona gwekondjelomanguluko Frieda Ndatipo, a yahwa okusa, pethimbo lyehololomadhilaadhilo lya ningilwa mOvenduka momasiku 27 gaAguste mo-2014.


Ompangu yopombanda oya popi kutya Frieda okwa yahwa shaali paveta komuntu keeshiwike.




Oomvula mbali dha piti, aakalelipo yopaveta oya popi kutya oshiningwanima shoka otashi gandja oshilongwa shesimaneko lyomwenyo gwomuntu na nkene ku na okukondololwa omahololomadhilaadhilo.
“Oshilongwa shiilongwa mpaka okutya, oomwenyo nadhi gamenenwe po ethimbo kehe. Shoka sha ningwa kuFieda Ndatipo na yakwawo okuholola omaiyuvo gawo. Uuthemba mboka nawu simanekwe. Onkalo ndjoka yo kuhalakanitha aahololimadhilaadhilo taku longithwa oonkondo kayi li pakotampango. Oshilongwa shimwe shoka shi na okwiilongwa ooshoka kutya muundemokoli aantu oya pumbwa okupitikwa ya holole omaiyuvo gawo nomanyenyeto gawo giinima mbyoka kaya uvitile ombili. Ekondololo lyaahololimadhilaadhilo nali ningwe ihe naku simanekwe uuthemba wawo,” omukalelipo gwopaveta guuthemba womuntu, Norman Tjombe ta ti.


Amushanga gwoSPYL nale, Elijah Ngurare okwa popi kutya eso lyaNdatipo otali kala oshiyadhi kakushi owala kwaangoka uumbu oholo ihe nokwaamboka taya holoke nakuumba ondjembo moshiningwanima shoka.
“Ngaashi nda popile mEhafo pethimbo twa fumbike Frieda oomvula mbali dha piti, ngeno okwa li omunenentu nenge andola aakuluntu ye aanenentu andola nakumudhipaga okushiwike nale,” Ngurare ta ti.





Sho a gandja omahekeleko kofamili yaNdatipo oshowo kaanona ye, Ngurare okwa popi kutya oku na einekelo kutya oshili otashi ka za mo esiku limwe.
Ndatipo okwa li e na oomvula 26 na oku na uunona utatu. Ongula yesiku ndyoka okwa holola omananathano pokati kopolisi naanona yekondjelomanguluko. Aahololimadhilaadhilo oya umbu opolisi nomamanya nopolisi oya yamukula pakuumba oondjembo naatolinkundana oyendji oye na einekelo kutya yimwe yomooholo dhoka oyo yayaha Ndatipo.
Ndatipo okwa valelwa moLubango shaAngola momasiku 19 gaFebruali mo-1988 na okwe ya moshilongo mo-1989 onga oshitopolwa shokatokolitho kIigwana yaHangana konomola 435.
Okwa ningi odhigwa mepupi lyoomvula ooshona na okwa hulile mondondo onti-9. Oku na aamwayinamati yaali oshowo okamwayinakadhona kamwe. Oku na uunona utatu nokanona hoka okashona okwe ka thigi ke na oomwedhi 21.


A dhipagwa kuwalye
MuAguste gwomvula ya piti, omapulaapulo ga ningwa omolwa eso lyaNdatipo, ngoka ga ningilwa mOmpangulio yoPombanda oga holola kutya okwa dhipagwa kohoolo yimwe ndjoka yuumbwa komuntu keeshiwike.
Omupanguli Christie Liebenberg pethimbo ndyoka okwa popi kutya nakudhipaga Ndatipo ina vula okumoika kiikwatelelwa komaumbangi ngoka ga gandjwa.



Omupanguli okwa popi kutya oombangi mbali dhiithikamena odha popi kutya gumwe nenge yaali yomaanona mboka ye kondjelomanguluko oya li ye na ondjembo . Oholo ndjoka yemu dhipaga oya pitimo molutu lwe onkene inayi vula okumonika opo andola yi landulwe kutya oya za kondjembo yini.
“Onkene ompangu oya mono kutya nakusa okwa dhipagwa shaaheli paveta komuntu keeshiwike,” Liebenberg a popi.
GORDON JOSEPH