Ompumbwe yomahangu mongeshefa

Namibia okwa lopotwa kutya okwa taalela ompumbwe yiilya yomahangu mongeshefa yokulonga omausila noongamba dhoshilongo inadhi patululwa nokupitika e eto lyiilandomwa okuza pondje yoshilongo, konima sho dha li dha pwatwa muJanuari.Pahapu dhaPieter van Niekerk, menindjela gwomalanditho moNamib Mills, ehangano lyoAgro Marketing and Trade Agency (AMTA) olya koleke kuyo kutya olya landa omahangu ga hugunina ga thika pootona 70 moshilongo.Omahangu ngoka ga hupuko oga nuninwa oprograma yoshikukuta omolwa onkalo yoshikukuta ndjoka ya taalela oshilongo.Okwa lombwele oNamibian Sun kutya opo ya vule okuthitika omwaka ngoka gu li mongeshefa ngashiingeyi komausila gawo gaMeme Mahangu oya pumbwa okutsa ootona dhiilya dha thika po 11 mesiku.“Monena otu na owala ootona ntano dhomahangu,” omunambelewa ngoka a popi nokugwedha po kutya taya ka taalela ompumbwe yuusila waMeme Mahangu muule owala womasiku gahamano.Okwa popi kutya oya tumina nale aayakulwa yawo omikanda.AMTA okwa popi kutya oongamba odha li dha patululwa nokupitika elando lyomahangu okuza pondje momasiku 18 gaDesemba omvula ya piti ihe odha patwa ishewe momasiku 22 gaJanuari opo ku gandjwe ompito kaanamapya yomoshilongo ya vule okulanditha po omahangu gawo ngoka ye na, okuza meteyo lyomvula yo 2018.Omunambelewa Omukuluntu muuministeli wuunamapya, Percy Misika okwa li a ningi etseyitho miikundaneki momasiku 23 gaJanuari kutya otaya pata oongamba sigo omahangu agehe ngoka ge li maanafaalama yomoshilongo ga landithwa po.Nonando ongamba odha patululwa ngashiingeyi otashi kutha omasiku ge li po 65 opo iilya mbyoka yi thike moNamibia okuza koIndia hoka hayi landwa.Aanangeshefa yaali yopetameko mboka haya landa omahangu okuza moNamib Mills, itaya vulu ngashiingeyi okugandja omayakulo kaayakulwa yawo omolwaashoka ngashiingeyi itaya vulu okutsa omahangu ngoka nokulanditha omausila ngaashi haye shi ningi shito.Sofia Negonga gwehangano lyoPunikwa Agro-Processing mOvenduka okwa popi kutya aalandi yawo unene aakalimo yomomalukanda mOvenduka, ihe ngashiingeyi oye na ompumbwe yomausila na kaye na shoka taya vulu okulanditha kaalandi yawo.Negonga, ngoka e na aaniilonga ye li yahamano okwa popi kutya onkalo otayi mu thiminike opo a kuthe miilonga aaniilonga yatatu nongele onkalo inayi lunduluka nena otaka thiminikwa opo a pate ongeshefa ye.Okwa popi kutya okwa shangela omukanda Omunambelewa Omukuluntuwiliki gwoNAB, Fidelis Mwazi, na okwa lombwele oNamibian Sun kutya Mwazi okwe mu tseyithile kutya oshikumungu shoka oshi li kuuministeli wuunamapya.Van Niekerk naye okwa holola woo omaiyuvo ge omolwa onkalo ndjoka ta popi kutya ehangano lyawo otali ka kanitha iiyemo yi li poomiliyona 2 komwedhi, ta popi kutya ngele oongamba odha patululwa mbala nokulanda omahangu pondje nena otashi gamenena po oompito dhiilonga dhaaniilonga na itaku ningwa omakutho miilonga.Momasiku ga 6 gaMei, omuleli gwaNamibia, Hage Geingob okwa tseyitha kutya onkalo yoshikukuta moshilongo oya ninga onkalo yopaulumomhumbwe ngashiingeyi, omanga muMaalitsa okabinete ka tseyitha kutya otaku pumbiwa oshimaliwa sha thika poomiliyona 572.7 megandjo lyoondya dhoshikukuta pokati komvula yo 2019 no 2020. AMTA oshowo uuministeli wuunamapya inaya yamukula komapulo ngoka ya ningilwa omanga onkundana ndjika inayi nyanyangithwa.YANNA SMITH

Ompumbwe yomahangu mongeshefa

Comments

Namibian Sun 2025-09-17

Please login to leave a comment

Ompumbwe yomahangu mongeshefa

Comments

Namibian Sun 2025-09-17

Please login to leave a comment

Login