Ompumbwe yiilonga moshilongo

Konyala aantu ya thika po 364 000 moNamibia okwa lopotwa kaye na iilonga omvula ya piti, na unene oyoomvula dhi li pokati ko 20 no 24.Iizemo yomapekaapeko ngoka ga ningwa koNamibia Statistics Agency (NSA) oya holola kutya ondjele yokwaahena iilonga moshilongo oya li ya thikama poopresenda 33.4 momvula yo 2018.Okwa dhidhilikwa eshuno pevi eshona okuyeleka nondjele yoopresenda 34, ndjoka ya lopotwa momvula yo 2016, omanga momvula yo 2014 ondjele yokwaahena iilonga moNamibia ya li poopresenda 27.9.Palopota yoNSA, eshuno pevi eshona ndyoka lya dhidhilikwa omvula ya piti, olya etithwa kaaniilonga mboka ya kanitha iilonga ya mono iilonga yiimwe nenge ya toto oongeshefa dhawo nokwiimonena iilonga yoyene. Nonando ondjele yoopresenda oya holola shuno pevi eshona, omuyalu gwogwene gwaamboka kaye na iilonga ogu li po 364 411 na ogu li e yo pombanda naantu ye li po 15 028 okuyeleka nomvula yo 2016. Kwiikwatelelwa natango komiyalu, oopresenda 34.3 dhaakiintu kadhi na iilonga omanga aalumentu mboka kaye na iilonga ye li popresenda 32.5. Moondoolopa omwa li aakiintu ye li po 107 691 kaye na iilonga omvula ya zi ko okuyeleka naakiintu 82 816 miitopolwa yomuushayi. Aalumentu ye li po 100 552 moondoolopa okwa lopotwa kaye na iilonga okuyeleka 73 352 miitopolwa yomuushayi.Iitopolwa ngaashi Kavango East oshowo Kunene oyo yimwe yomiitopolwa kwa lopotwa ya li nomwaalu omunene gwaantu kaye na iilonga, sho kwa lopotwa oopresenda 48.2 oshow 41.6%. Omusati, ogu na oopresenda 24%, omanga oshitopolwa shaKhomas shi na oopresenda 31.5.Pamayalulo ngoka ga ningwa aanyasha oyo unene ya dhengwa kodhimbo yokwaahena iilonga. Konyala aantu ye li po 265 770 yoomvula dhi li pokati ko 15 no 24 okwa lopotwa kutya kaya li ye na iilonga omvula ya zi ko, nomwaalu ngoka ogu li e yo pombanda naantu 19 508 okuyeleka nomvula yo 2016.Mokati kaanyasha mboka, o 140 564 aakiintu, mwakwatelwa aakiintu 79 992 yomoondoolopa. Ondjele yokwaahena iilonga maanyasha oya li po 30.3%, omvula ya piti.Aanyasha yeli po 305 981 kaye na iilonga, nenge aanaskola.Oopresenda 47.5 odha lopotwa moshitopolwa shaMaheke omanga moKhomas mwa lopotwa oopresenda 34.4.Oopresenda 37.5 dhaanyasha mboka kaye na iilonga odhi na owala elongo lyoondondo dhopetameko okuyeleka noopresenda 33.33 mboka ye na elongo lyoondondo dhoombanda. Mokati kaanyasha mboka ye na oodegree nenge oodiploma, ya kalela po oopresenda 18 kaye na iilonga.JO-MARÉ DUDDY

Ompumbwe yiilonga moshilongo

Comments

Namibian Sun 2026-02-18

Please login to leave a comment

Ompumbwe yiilonga moshilongo

Comments

Namibian Sun 2026-02-18

Please login to leave a comment

Subscription Required to Access Content ×

Login

Subscription Required to Access Content