Ompangu ya ekelehi oshipotha shoNamRights

Ehangano lyoNamRights olya popi kutya itali ka thiga emanya lya londa kekwawo moonkambadhala okupataneka etokolo lyOmpangu yoPombanda, ndyoka lya holola kutya ehangano ndyoka kali na omakankameno gopaveta okuya kompangu opo li pule oshituthi shOlufuko shi kalekwe.

Metitano ngoka ta longo pehala lyomupanguli mOmpangu yoPombanda, Collins Parker okwa ekelehi eindilo lya ningwa komukomeho gwoNamRights, Phil Ya Nangoloh netompelo lyomakankameno gopaveta.

Omupanguli okwa pula, NamRights a fute iifuta yopaveta yaayamukuli yane moshipotha shoka epangelo, elelo lyopamuthigululwakalo lyaMbandja oshowo lyaMbalantu nomupresidende nale Sam Nujoma.

Nujoma, ngoka e li kuume koshituthi shoka, okwe shi patulula pambelewa muAguste gonuumvo.

Konima sho etokolo ndyoka lya ningwa, NamRights okwa pititha omukanda moka a holola kutya etokolo ndyoka otali halutha, na Ya Nangoloh okwa uvaneke taka ninga eindilo mompangu yopombandeeela moshilongo, omolwa etokolo ndyoka lya ningwa kombinga yoondjokana dhaanona aashona, pahapu dhe.

NamRights okwa li a popi kutya oshituthi shoka otashi yi pondje oonkuluhedhi dhopauntu, omithigulwakalo, opolotika nonkalathano sho aanona yaakadhona mboka unene ya za pomaluhepo ye na omagundji geli kombanda taga ulikwa inashi za komahalo gawo.

Okwa tsikile kutya oshituthi shoka otashi ningwa momukalo gweuliko lyiipindi moka aanona aashona taya ulikwa ye li omalutu kombanda.

Metokolo lye, Parker kwa popi kutya NamRights, ngoka a kalelwapo kuYa Nangoloh, okwa ningi eindilo pehala lyaanona yamwe po mboka inaya tumbulwa komadhina na oyeli meni lyomvula 18.

Omupanguli okwa popi kutya NamRights okwa ndopa okugandja uumbangi mompangu nokuyelitha ekwatathano pokati ke naavali oshowo aasilishisho yaanona mboka, mboka aavali nenge aasilishisho inaya vula okukaninga eindilo ndyoka yoyene mompangu.

Parker okwa ekelehi omatompelo gaYa Nangoloh kutya onga ehangano li lilepo uuthemba womuntu oli na oonkondo dhopaveta okufala kompangu oshipotha shoka, moka omupanguli a yamukula kutya omuntu a gumwa uukilila moshikumungu oye owala e na uuthemba wopaveta okufala eindilo kompangu lyekaleko lyoshituthi shoka.

Ya Nangolo okwa popi kutya epangelo otali kutha ombinga moshituthi shoka tashi yi pondje uuthemba womuntu, nemanguluko ngaashi tashi thomonwa mOntopolwa Ontitatu yEkotampango lyoshilongo.

Ya Nangoloh okwa popi kutya Parker okwa ningi epuko mompango meningo lyetokolo lye nokutenda kohi kutya NamRights okwiinekela kutya oondjokana dholudhi ndoka kadhi li pakotampango.

Parker, mEtitano okwa popi kutya oshituthi shoka sha ningwa lotango momvula yo 2012, oshi li ondjila yaanona yaakadhona uuna ya yi komathimbo gawo gotango.

Omupanguli okwa popi kutya oshituthi osha nuninwa okulundulula aanona mboka yaakadhona okuya muukuluntu, na oshili omukalo gwopamuthiglulwakalo okugamena aanona yaakadhona okuza komilalo, oku ya pa ontseyo kombinga yeisimaneko oshowo okusimaneka ofamili.

Omupanguli okwa popi kutya oshituthi otashi hwahwameke elongo lyopamilalo nokutsa aanona yaakadhona omukumo opo kaya ye momilalo.

JANA-MARI SMITH