Omaumbangi medhipago lyaakomeho yaNIMT

Ernst Lichtenstrasser, ngoka ta pangulilwa oshipotha shedhipago lyomunambelewa omukomeho gwoshiputudhilo shoNamibia Institute of Mining Technology (NIMT), Eckhart Mueller pamwe nomupeha gwe Heimo Hellwig kali a ningilwa omatilitho nokuthiminikwa kopolisi a zimine omadhipago ngoka.

Pahapu dhomunambelewa omukomaakoni moshipotha shoka Inspector Reinhardt Maletzky, okwa popi kutya Lichtenstrasser okwa li ta dhilaadhila nawa pethimbo a zimine omadhipago ngoka na okwe shi ningwe ye mwene pakwiiyamba.

Maletzky okwa popi ngaaka ta gandja uumbangi we, pethimbo kwa pulakenwa eindilo lyomboloha yaLichtenstrasser mOmpangulilo yaMangetrata gwaSwakopmund, ndyoka lya kwatelwa komeho kOmukalelipo gwepangelo Antonia Verhoef.

Omunambelewa omukonaakoni gwoshipotha okwa gandja uumbangi wu na oonkondo moshipotha shoka tashi pangululwa Lichtenstrasser. Maletzky, ngoka a longa onga omunambelewa gwopolisi mOkahandja uule woomvula 32, okwa popi kutya ye pamwe niilyo iikwawo yi li o 10 oya konaakona omadhipago ngoka ga ningilwa moNIMT. Lichtenstrasser, ngoka a li kohi yetonatelo enene lyopolisi ota tamanekelwa edhipago lyaMueller oshowo Hellwig mboka ya yahwa okusa muApilili nuumvo pendiki lyoNIMT moArandis.

Lichtenstrasser okwa popi pethimbo lyepwaakeno lyeindilo lye lyomboloha kutya okwa zimine komadhipago ngoka molwaashoka opolisi oye mu ningile omatilitho gokutula miipandeko omukulukadhi gwe.

“Onda li dha hala okugamena omukulukadhi gwandje na osha thiminikendje ndi zimine komadhipago ngoka,” omunamimvo 58 omvalele yaAustria ya popi.

Maletzky okwa lombwele ompangu kutya omakonaakono moshipotha shoka ogeli pondondo moka aantu yendji tashi vulika ya katulwe miipandeko.

Okwa tsikile kutya ondjembo ndjoka ya longithwa oya adhika ya holekwa mombuga, niikuti mbyoka ya adhika pehala lyoshiningwanima otayi faathanithwa niikuti ya adhika pehala mpoka hapu idheulile Lichtenstrasser mokuumba ondjembo popepi nOutjo oshowo pehala lye lyokuza mOtavi.

Maletzky okwa popi kutya Lichtenstrasser okwa li a ningile Mueller omatilitho omanga omadhipago ngoka inaga ningwa, sho e mu lombwele opo a kale ta lala a tonata.

Omufali gwiihokolola mompangu moshipotha shaLichtenstrasser, Verhoef okwa gandja omatompelo gatano kutya omolwashike ita vulu okupewa omboloha.

Lichtenstrasser okwa kalelwa po kuhahende gwe, Trevor Brockerhoff. Omufekelwa okwa zimine kutya okuli oshitopolwa shongundu ndjoka ya li tayi nyana nokuningila omapulo elelo lyaNIMT, kohi yelelo lyaMueller.

Okwa popi kutya iilyo ayihe oyali yi na uupyakadhi naMueller, na ha ye owala. Nonando okwa tindi omalundilo, okwa zimine kutya okwa li momudhingoloko gwaArandis mombuga, momasiku 15 gaApilili.

Okwa popi kutya okwa li a nyenyeta nomukulukadhi gwe moTsumeb na okwe mu lombwele kutya otayi kuJason omuniilonga nale gwaNIMT, ngoka ha kala moSwakop. Okwa yi moshiketha she shokupungula na okwa pakele ondjembo ye pamwe niikuti.

Omolwa uuwehame wepepe, okwa nu oopela dhokudhenga po uuwehame na okwa kotha popepi nondjila pokati kaUsakos nArandis.

Okwa popi kutya okwa penduka a ngwangwana ongula yOmaandaha esiku ndyoka kwa ningwa omadhipago ngoka, na okwa li a yi mombuga.

Metiyali okwa tokola oku shuna koTsumeb ihe mondjila okwa uvu kombinga yomadhipago ngoka moradio, na okwa tulwa miipandeko moKaribib.

Mangestrata Conchita Olivier okwa undulile oshipotha shoka koamsiku 24 gaJuli nuumvo.





ERWIN LEUSCHNER