Omatungo gaali pamulandu otaga shunitha pevi ondoolopa yaNiipa

Mayola gwondoolopa ndjoka Immanuel Kambonde okwa kunkilile kutya ngele aakalimo otaya tsikile nomukalo ngoka gwokutunga omatungo gawo nonando inaya pewa epitikilo, nena otashi ka etitha opo ondoolopa ndjoka yi shunwe pankatu yomukunda mpoka ya li nale.Kambonde okwa lombwele oNamibian Sun kutya ondoolopa ndjoka oyi na omatungo ga thika pe 1 000 ngoka ga tungwa shaaheli pazimino lyelelo lyondoolopa ndjoka. Okwa popiwa kutya aakalimo nooyene yomikunda ngaashi Oniihandi, Omuhozi, Iiyale, Onampadhi, Ondando, Okambonde, Onamulunga, Iinongo oshowo Oshaakondwa otaya landitha po evi ndyoka Ii li meni lyoongamba dhondoolopa.Kambonde okwa tsikile kutya aalandi yomavi ngoka oya tameke taya tungu omahala gawo ngoka konima sho okaalita kondoolopa katendwa naasho ondoolopa ndjoka ya tseyithwa pambelewa mo 2015. Mayola okwa tsikile kutya oya yi moonkundathana naatungi oshowo aakwashigwana nokuya yelithila kutya shoka taya ningi kashi li pamulandu na oye ya pula ya hanagulepo omatungo gawo ngoka, ihe inaye shi ninga.“Omanga inaya tunga omatungo gawo okaalita kondoolopa okali nale ka tendwa. Nomatungo ngoka otashi ulike kutya kage mo mokaalita koompangela dhondoolopa. Yamwe oya tungu mokati koondjila dhoka dha pangelwa okutunga oshowo momavi giiputudhilo. Otu na okupangela etungo lyondoolopa twiikwatelela kokaalita. Okutenda ondoolopa oshinima shi na ondilo molwaashoka ohashi ningwa kaatseyinawa okupitila momapekaapeko ga yooloka,” Kambonde ta ti.Kambonde okwa tsikile kutya onkalo ndjoka tayi shunitha pevi ongushu yondoolpoa na okwa popi kutya omahala ngoka ga tungwa omagumbo oshowo oongeshefa.“Aakalimo yomOniipa naya nongele kutya elelo lyondoolopa ohali totwapo koompango, omulandu ngoka tagu etitha omayambulepo gondoolopa oshowo iilonga yondoolopa kwiikwatelelwa kOmpango yOmalelo gOondoolopa. Omanga elelo lyondoolopa tali longo nuudhiginini opo li a dhe omalalakano galyo geyambulepo lyondoolopa, oshigwana nashi nongele kutya otashi kutha ethimbo okuya moonkundathana naakuthimbinga ayehe.”MuAguste nuumvo, elelo lyondoolopa ndjoka olya kala muupyakadhi konima sho lya tokola okuhanaguapo egumbo lyoshilyo shetanga lyegameno, Timotteus Ileka, ndyoka lya tungwa pwaahena epitikilo okuza kelelo lyondoolopa.Ileka okwa ningi omatilitho kutya otaka yaha kehe gumwe ngoka taka guma egumbo lye, ndyoka lya li inali pwa okutungwa pethimbo ndyoka. Elelo lyondoolopa otashi ulike lya kaleke oompangela okuhanagulapo egumbo ndyoka, nomukwashigwana ngoka okwa manitha etungo lyegumbo lye ngashiingeyi.ILENI NANDJATO

Omatungo gaali pamulandu otaga shunitha pevi ondoolopa yaNiipa

Comments

Namibian Sun 2025-07-03

Please login to leave a comment

Omatungo gaali pamulandu otaga shunitha pevi ondoolopa yaNiipa

Comments

Namibian Sun 2025-07-03

Please login to leave a comment

Login