Omananathano taga yi moshipala ehumokomeho

OMUTOOLINKUNDANA GWOMENI



OVENDUKA

Onkalo yopolotika nuukwamuhoko otayi pelwa ombedhi ekutho miilonga lyaanambelewa aakuluntu melelo lyaGobabis.

Shoka otashi ningwa nonando oongundu dhopolotika dhompilameno dhoka dha sindanako omalelo goondoolopa odhindji moshilongo sha landula omahogololo ngoka ga ningwa omvula ya piti, dha gandja omukumo kutya mboka ya sindwa itaya ka ningilwa omambandameko.

Ngashiingeyi AaSwapo oye wete kutya taya ningilwa okatongo nomahwahwameko gopapolotika ga nuninwa okuya kutha miilonga.

Shoka osha holoka sho ongundu yaanambelelwa aakuluntu melelo lyaGobabis ya fala kompangu omugandji gwawo gwiilonga konima sho ya kuthwa miilonga.

Ongundu yaanambelewa mboka otaya pula ya shunwe miilonga taya popi kutya otaya mbandamekwa.

Mboka ongaaashi Filemon Makili omunambelewa giiyemo, corporate executive, Frieda Shimakeleni, IT officer Kondjeni Nghiwanapo, IT technician Paul Kayambu, oshowo ngoka ta longo pehala lyomunambelewa omukuluntu gwoonzo dhopauntu, Ashipala Kayambu oshowo menindjela gwiikwamalusheno Johannes Nantuua.

Oya kuthwa miilonga momasiku ga yooloka pokati komwedhi Mei naAguste nuumvo.

Ongundu ndjoka otayi kalelwapo kuhahende Sisa Namandje, ngoka gandja etseyitho kompangu kombinga yaayakulwa ye mboka yahala okukondjitha ekutho lyawo miilonga.

Makili okwa popi kutya aaniilonga mboka ye li iilyo yoSwapo nenge iilyo yomuhoko inagu za moshitopolwa shaMaheke nenge moGobabis nakaye shi aapopi yelaka lyOshiwambo otaya ningilwa omambandameko kOmunambelewa nale Omukuluntu gwelelo, ndyoka Ignatius Thudinyane.

Nonando Makili ota popi kutya ekutho lyawo miilonga otali yi moshipala egandjo lyomayakulo kaakalimo mondoolopa, aakalimo mondoolopa ndjoka oya kala uule noomvula taya nyenyeta endopo lyamuni gwondoolopa ngoka okugandja omayakulo kaakwashigwana.

Elelo otali popilwa woo uulingilingi megandjo lyotendela oshowo uukombunda.

Onzo yimwe melelo lyondoolopa ndjoka oya holola kutya aanambelewa mboka otaya ililitha molwaashoka itaya vulu we okuninga ngaashi ya kala haya ningi kehe shoka yahala.

“Pula kehe gumwe mondoolopa oyendji oya kala taya longo ya fa yeli momagumbo gawo. Ompumbwe yomayambulepo mondoolopa negandjo lyomayakulo otali popi lyo lyene kombinga yiilonga yawo,” onzo ya holola.

Makili okwa popi kutya uupyakadhi mboka owa tameke konima yomahogololo ngoka ga ningwa muNovemba gwo 2020 sho ookansela okuza koGobabis Ratepayers Association, National Unity Democratic Movement, Landless People’s Movement and Popular Democratic Movement ya kuthako elelo lyondoolopa.

Okwa popi kutya ekutho miilonga lyawo olya hwahwamekwa kopolotika noli li uukwamuhoko.

MuJuni gwomvula yo 2019, Thudinyane okwa li a pititha olopota tayi popi kutya aanambelewa melelo lyondoolopa mboka taya futwa oondjambi dhili pombanda itaya gwanitha po iilonga yawo, oye mu dhina, kaye na uunongo welelo na oya ndopa okumona ekano lyoomiliyona dhelelo.

Sho a popi kombinga yekondjo lyompangu lyaanambelewa mboka, gumwe gwomaakalimo yomondolopa ndjoka, Wallace Finnies okwa lombwele oNamibian Sun pangodhi kutya olugodhi ndoka ngashiingeyi olwa guma aakalimo yomondoolopa, molwaashoka kape na we egandjo lyomayakulo kaakwashigwana nomayambulepo gondoolopa molwaashoka mboka ya li ye na okugandja omayakulo ngoka otaga kondjo manga. Okwa pula mboka ya kandulepo uupyakadhi mboka wu li pokati kayo pondje yompangu.