Omakutho miilonga gaanambelewa shaaheli pamulandu, ogeli omukundu

Omalelo moshitopolwa shaKunene oshowo Omusati, oga longitha iimaliwa ya thika poomiliyona 1.5 mokufuta oondjambi dhaanambelewa mboka ya tulwa pevi na inaku ningwa omatokolo gasha natango.



Elelo lyoshitopolwa shaKunene olya kutha miilonga shaaheli paveta, Omukuluntupitithi gwOpashitopolwa ochief regional officer (CRO) konima shoPublic Service Commission (PSC) a tindi okupopila ekutho miilonga ndyoka omanga Oshitopolwa shaMusati sha kutha miilonga aanambelewa yaali shaaheli pamulandu, ihe lwanima ekutho miilonga lyawo olya popilwa koPSC.

Omunashipundi gwoPSC, Marcus Kampungu okwa lombwele oNamibian Sun kutya kape na omatompelo ge na omungo po ku kuthwe miilonga CRO gwaKunene, George Kamseb.

Nonando ongaaka okakomisi hoka oka zimine ekutho miiilonga lyomunambelewa gwoCRO Protasius Andowa oshitopolwa shaMusati oshowo omupeha omukomeho gwiiyemo moshitopolwa shoka, Elizabeth Mutota.

“Konima sho twa nongele miikundnaeki kutya elelo lyaMusati olya kutha miilonga aanambelewa mboka inaku landulwa omilandu otwa yi nayo mekwatathano na oya kutha ko elombwelo ndyoka twe ya pe. Oya ningi eindilo lyekutho miilonga lyaanambelewa mboka na otwa zimine eindilo ndyoka,” Kampungu ta ti.

Kampungu okwa tsikile kutya oya mono eindilo muNovemba gwo-2016, tali pula opo ku kuthwe miiilonga Kamseb, konima yomwedhi gumwe sho a kuthwa nale miilonga kashi li papampango, ihe oya tindi eindilo ndyoka molwaashoka kape na omatompelo ngoka taga thiminike omunambelewa ngoka a kuthwe miilonga. Okwa tsikile kutya opo ya zimine ekutho miilonga lyomunambelewa ngoka nena opwa pumbwa okukala pe na omatompelo kutya otashi vulika omunambelewa ngoka a ye moshipala omakonaakono ngoka ta ningilwa.

Kampungu okwa popi kutya oya gandja omayele koshitopolwa shaKunene opo shi pangule Kamseb omanga ta longo natango.

Oonzo dhimwe odha notheleko oNamibian Sun kutya elelo lyoshitopolwa shoka olya pula Kamseb opo a shune kiilonga ihe okwa tindi molwaashoka aniwa ina tseyithilwa kutya omolwashike a li a kuthwa miilonga.

Onzo yimwe oya holola kutya Kamseb okwa kuthwa miiilonga sho a ndopa okugandja kelelo lyoshitopolwa shoka okondalaka ye yiilonga.

Konima yoonkundathana dhoka dha ningwa kelelo lyoshitopolwa oshowo okakomisi koPSC, elelo olya pula omunambelewa ngoka a shune kiilonga ihe ye okwa tindi.

“Elelo oli li monkalo ya piyagana ngashiingeyi molwaashoka olya ndopa okutseyithila omalelo gomondjila kombinga yekutho miilonga lyomunambelewa ngoka. Kamseb okwa tindi okushuna kiilonga omanga ina pewa omatompelo kutya okwa li a kuthilwa shike miilonga. Opo owala ya yi moonkundathana nomalelo gomondjila ngashiingeyi,” Onzo ndjoka ya popi.

Andowa, Mutota naKamseb oya kuthwa miilonga ihe otaya mono oondjambi dhawo dhokomwedhi dhiihwapo.

Andowa naMutota oye li komagumbo gawo ya kuutumba taya mono ondjambi yawo uule woomwedhi hetatu ngashiingeyi omanga Kamseb a kala pevi uule woomwedhi hamano.

Omunambelewa gwoCRO oha mono ondjambi yi li pokati kooN$489 661 sigo N$519 632 komvula, ondjambi ndjoka yi thike pamwe nondjambi amushanga guuministeli.

Ohaya mono omauwanawa gomagumbo gooN$7 506 kehe omwedhi oshowo omauwanawa giiyenditho gooN$10 936, omanga aapeha aakomeho haya mono ondjambi yi li pokati kooN$421 859 no N$443 502, ohaya mono omauwanawa giiyenditho gooN$5 993.



Kampungu okwa popi kutya omakutho miilonga goludhi ndoka inaga pumbwa okukala uule wethimbo li thike mpoka.

Nonando ongaaka Ompango yOmalelo gIitopolwa onti-22 yomo-1992 pamwe nompango yAaniilonga yEpangelo onti-2 yomo-1980 inadhi tothamo kutya omakutho miilonga ngoka oga pumbwa okuningwa ethimbo li thike peni.

“Uuna to ningi eindilo opo ku kuthwe miilonga omunambelelwa gwontumba nena pumbwa okutalikako kutya oshinima shopaulumomhumbwe.

Molwaashoka aanambelewa mboka inaya pangulwa nenge ya ningilwe omitumba dhomautho nena katu shoka tatu vulu okuninga po,” Kampungu ta ti.

Modestus Amutse naJulius Kaujova, oyo aanashipundi yomalelo lyaMusati naKunene na ayehe oya popi kutya kaye shi kutya oshike tashi ningwa po miipotha mbyoka.

Momusati, omukomeho gwiilonga yakwalukehe, Gervasius Kashindi oye ta longo pehala lyomunambelewa gwoCRO, omanga omunambelewa omukuluntu gwomayalulo, Ngombe Iyambo oye ta longo pehala lyomupeha omukomeho gwiiyemo.

MoKunene omukomeho gwiilonga yakwalukehe, Joseph Jantze oye ta longo pehala lyomunambelewa gwoCRO.

Andowa, okwa kala melelo ndyoka okutameka omvula yo-2004, nokondalaka ye yiilonga otayi thiki pehulilo, pehulilo lyomvula twa taalela, omanga okondalaka yaMutota tayi thiki pehulilo muSepetemba gwonuumvo.

Oonzo odha popi kutya ookansela oya hala okukala yamwena koshikumungu shoka ya tegelele ookondalaka dhawo dhi thike pehulilo.

“Sigo oompaka kandi shi shi kutya oshike tashi ningwa po. Oshikumungu shoka oshi li momake gelelo lyoshitopolwa na inandi tseyithilwa sha natango. Uuna nda mono uuyelele nena otandi ke mu tseyithila,” Amutse ta ti.

Amutse okwa li a lombwele oshikundaneki shika omvula ya piti kutya, ominista yEyambulepo lyiitopolwa noondoolopa, oya tuma osheendo shaanambelewa opo ya kakonaakone aanambelewa mboka.

Okwa koleke kutya elelo olya kuutumba iikando iyali opo li kundathane onkalo ndjoka ihe sigo onena okwa tinda okupopya kutya oshike sha kundathanwa.

“Otwa longa oshinakugwanithwa shetu, otwe mu tula mefudho, uuyelele kehe tawu pumbiwa po, puleni Omushanga gwUuministeli wEyambulepo lyIitopolwa nOondoolopa,” Kaujova ta ti.

ILENI NANDJATO