Omaiyuvo komadhipago gaakiintu moNamibia

Ongeyo oshowo okwaahataambako okweethiwa oshimwe shomwaambyoka tayi hwahwamekitha aalumentu AaNamibia ya tsikile nokudhipaga oshowo oku monitha iihuna aakiintu yawo.

Shika sha popiwa kaatseyinawa mboka ya popi kombinga yomadhipago nomiyonena tadhi ningilwa aakiintu ndhoka dha londa pombanda moshilongo.

Oshiningwanima shimwe omoka omulumentu gwoomvula 29 a dhipaga yina yaanona ye yaali pamwe nomumwayina nokonima okwiikutha omwenyo.

Omulumentu ngoka okwa tete nekatana aakiintu mboka nokuya teta omiligu sha ningilwa momukunda Omahenge moshitopolwa shaHangwena, nokonima omulumentu okwiidhipaga.

Movenduka omulumentu gwoomvula 35 okwa dhipagele omukiintu gwe mombashu yawo moWanahenda koongulasha dhOsoondaha.

Olutu lwomukiintu olwa adhika nekuya pothingo, nomulumentu ngoka okwa tomeke ombashu omulilo sha landula sho adhipaga omukiintu ngoka.

Metine lya piti, omunambelewa gwopolisi mOmbaye okwa yaha omukadhona gwe nale moKuisebmond nondjembo ye yiilonga na okwa tulwa miipandeko konima sho iigandja ye mwene kopolisi.

Omusita Ngeno Nakamhela okwa lombwele Namibian Sun kutya ope na ongeyo ya holama maalumentu ndjoka tayi etitha elongo lyiimbuluma mbyoka.

Okwa popi kutya oshinima shimwe natango aalumentu yamwe ihaya taambako emanguluko lyaakiintu.

Okwa popi kutya aalumentu inaya longekidhilwa elunduluko ndyoka onkene kaye shi kutya naya ninge ngiini uuna aakiintu taya ithikamenepo.

Omusita okwa popi kutya okwa dhidhilike kutya aalumentu oyendji kaye shi kutya naya ungaunge ngiini uuna yeli moontamanana naakiintu mboka taya ipopile, nopehala ohaya longitha iimbuluma nomiyonena onga ekandulepo lyomukundu.

Nakamhela okwa popi kutya okwa pumbwa okutulwa miilonga oprograma dha nuninwa aalumentu opo ya vule okukondolola ongeyo yawo.

Ngoka ta longo pehala lyamushanga-ndjai gwoCouncil of Churches in Namibia (CCN), Ludwig Beukes, okwa popi kutya shimwe shoka tashi etitha onkalo ndjoka aalumentu ngoka inaya hala okutaambako okweethiwa na kaye shi okuholola omaiyuvo gawo.

Okwa popi kutya uuna aalumentu inaya halika, pehala oya hala okuholola oonkondo dhawo pehala lyokutaambako owala shoka shili po nokweetha.

Beukes okwa gandja oshiholelwa shehungomwenyo omanga inaku ningwa ondjokana ndyoka a li ta gandjwa, moka omukiintu a pula opo ya topoke manga ihe omulumentu ngoka okwa yi kegumbo lyawo opo a pule iinima mbyoka a landela omukiintu ngoka.

Beukes okwa popi kutya nonando omukiintu okwa ningi ngaashi omulumentu a pula, natango omulumentu ngoka okwa dhengepo omweelo gwegumbo nokumuyaha nokonima okwiidhipaga.

“Okwa pula iinima ye ihe natango ina nyanyukwa molwaashoka ina taambako okweethwa hoka nokuzimina kutya ekwatathano olya hula.”

Beukes okwa popi kutya aalumentu naya taambeko uuna aakiintu inaya hala we omakwatathano.

Okwa popi kutya omiyonena dhoka otadhi tsikile sho aakiintu yamwe yeli momakwatathano inaya nyanyukwa na oye na uumbanda itaya vulu okuza mo molwaashoka oya tila okumonitha iiponga nenge okudhipagwa.

Menindjela gwoopoloyeka moWhite Ribbon Namibia, Elina Mujuda, okwa popi kutya ope na euveko lyapuka maalumentu mboka ye wete kutya molwaashoka ohaya gandja sha kaakiintu yawo nena oye na uuthemba okuya monitha iihuna.

[email protected]

ELLANIE SMIT