Olugodhi lwuukwamuhoko

Oshinyolwa shaHaufiku osha nana omaiyuvo goyendji mwakwatelwa omuhikingalo gwoomusika dhomelaka lyoshimbulu gwaSouth Afrika, Steve Hofmeyr. Okutula omulilo omahooli, osho omupeha minista gwomauyelele, Engel Nawatiseb a ponokelwa omolwa elongitho lyehauto lyepangelo sho a ka landa oohi mondoolopa ndjoka mEtitano lya piti. Pahapu dhaHaufiku, ekalo lyaatiligane mehala moka oyo awike otashi hwahwamekwa komulandu oshowo onkalo yuulingilingi wuli pombanda unene moNamibia, na otashi ulike kutya aatiligane oya totapo omulandu gwawo gwopaliko. Omunambelewa omukuluntu gwehangano lyo Ohlthaver & List (O&L), Wessie van der Westhuizen okwa yamukula Haufiku kutya, egongalo lyopamwe ndyoka minista nale a popi iikolelela kulyo otali ithanwa Henties Bay Fishing Bonanza, ndyoka lya mangulukila omuntu kehe muuyuni.Van der Westhuizen okwa pula aantu opo kaya ninge egongalo ndyoka oshinima shoka shaaheshi elalakano lyegongalo ndyoka lyopamwe nokugwedha po kutya Aanamibia naya kondjithe uulingilingi, mboka tawu patele pondje ekoko lyeliko kuyamwe oshowo ekoko lyopankalathano. Omuntu gumwe okwa yamukula kutya oshituthi shoka otashi holola uukwamuhoko, na osha holola endopo lyuuleli wopangeshefa dhopombanda, ta gwedha po kutya omukomeho gwa O&L, Van der Westhuizen na konge omikalo dhokwahapatela pondje yalwe. Van der Westhuizen okwa yamukula kutya ota tsu kumwe nomatumbulo ngoka. “Omolwaashoka hatu gandja omayambidhidho koBrave Warriors, koopoloyoka yokutunga oongulu dhoskola, koothigwa nokoombaanga dhomahini noshotuu. Itandi kutha olugodhi nane, otandi ti owala inamu nduluka sha okuza moshituthi showala shoohi,” Van der Westhuizen a yamukula. Omunongononi gwopolotika, Henning Melber okwa yamukula kutya omahogololo goshali otaga pumbwa woo emanguluko lyopashimaliwa. Okwa popi kutya Aanamibia oyendji kaye na iiyemo tayi ya pitika okukatyapula oshituthi shoohi kondoolopa ndjoka yokomunkulofuta, hoka hako haya zi, na otashi pula aaniimaliwa oyo ya ka tyapule ethimbo lyawo hoka. Ndumba Kamwanyah okwa lombwele oNamibian Sun kutya nonando omuna uukwashili momapopyo gaHaufiku, oshili ooshoka kutya uukwamuhoko paliko moNamibia, kawu li we palwaala ihe opangundu yaanashimaliwa. “Ondi shi shi kutya natango otatu dhilaadhila kutya aatiligane otaya pula nawa komeho paliko naashoka oshi li uukwashili sigo opondondo yimwe, ihe ngele okwa ningwa omayalulo otatu mono kutya ongundu yimwe yaaluudhe oya wayinina ongundu ndjoka nokutota po etopoko. Ombinga yimwe otayi pula nawa komeho yimwe otayi nana nondatu,” Kamwanyah a popi. Omuntu gumwe okwa yamukula koshinyolwa shaHaufiku kutya oongundu dhimwe dhaantu ohadhi totopo pashito omulandu gwawo gwopaliko oshowo onkalathano, hoka Hofmeyr yamukula kutya shoka osho Haufiku ina hala okuuva. Nawatiseb okwa hala egameno lyopolisi Momukanda ngoka gwa shangelwa opolisi yaHenties Bay, Nawatiseb okwa pula egameno lyopolisi nuutile weehameko oshowo esithahoni okuza kaatiligane yamwe po mondoolopa ndjoka mwa kwatelwa omukwashigwana gumwe gwedhina Paul Smith. Okwa popi momukanda ngoka kutya ye pamwe nofamili oye oya kala ya taalela oluhindo okuza kaatiligane mboka ya kala woo taya ula ofamili yaNawatiseb omalaka omawinayi. jemima@namibiansun.comJEMIMA BEUKES

Olugodhi lwuukwamuhoko

Comments

Namibian Sun 2026-01-02

Please login to leave a comment

Olugodhi lwuukwamuhoko

Comments

Namibian Sun 2026-01-02

Please login to leave a comment

Subscription Required to Access Content ×

Login

Subscription Required to Access Content