Olopota yiimbuluma

JANA-MARI SMITH

Ondjele yiimbuluma yomomagumbo inayi shuna pevi pethimbo lyiituthi yomatango omanene ya piti, sho kwa ningwa omatulo miipandelo ga thika po 20 shi na sha niipotha yomadhipago, omadhengo nomakwato koonkomdo.

Aalumentu 16 oya tulwa miipandeko omanga aakiintu yane ya tulwa woo miipandeko.

Aafekelwa omugoyi inaya tulwa miipandeko pethimbo olopota ndjika ya pitithwa kopolisi yaNamibia.

Olopota ya pitithwa muNovemba gwomvula ya piti oya holola kutya oonakuninga iihakanwa yiimbuluma yomomagumbo ya kalela po oopresenda 4 oya lopota iimbuluma mbyoka kopolisi.

Natango olopota yoLandscaping Gender-based Violence in Namibia ya pitithwa koshiputudhilo shoInstitute for Public Policy Research (IPPR) muNovemba gwomvula ya piti oya holola ompumbwe yomauyelele kombinga yiimbuluma yoludhi ndoka, nonando okwa dhidhilikwa moshilongo kutya iimbuluma mbyoka otayi londo pombanda noonkondo.

Olopota ya pitithwa kopolisi okuya pehulilo lyaNovemba nomasiku 2 gaJanuari oya holola kutya opolisi oya patulula iipotha itano yomakwatonkonga ga ningilwa aanona. Aakuluntu 12 aakiintu nayo oya lopota iipotha yomakwatonkonga pethimbo ndyoka.

Okanona kokakadhona koomvula mbali oka pondwa kuyina gwoomvula 33 na okwa fumbike okanona hoka melambo okuya pehulilo lyaNovemba.

Okanona kokamati koomvula mbali okwa pi nayi sho ka tilwa omeya omapyu. Omuniilonga omusilishisho gwokanona hoka okwa tulwa miipandeko ihe lwanima okwa mangululwa sho kape na omaumbangi ga gwana.

Okanona kokakadhona koomwedhi ndatu oka adhika ka hulitha keehama komuste.

Omunamimvo 19 okwa tulwa miipandeko mEpukiro momasiku 30 gaNovemba omolwa oshipotha shekwatokonga okakadhona koomvula 12.

Mondoolopa yaUsakos, omulithi gwiimuna gwoomvula 56 okwa tulwa miipandeko momasiku 11 gaDesemba omolwa ekwatonkonga lyokanona koomvula 9. Opolisi otayi konaakona oshipotha shekwatopombambyona oshowo eningilo lyomiyonena dhiihulo okakadhona koomvula 15 hoka kali ka kwatwa po uule womasiku gatatu komulumentu gwoomvula 35 pofaalama yi li popepi noDordabis.

Okakadhona koomvua 16 okaningi etegelelo konima sho omulumentu gwoomvula 21 a tulwa miipandeko okuya pehulilo lyaDesemba sho a kala ta kwatwa onkonga okanona hoka nokukadhenga pokati komwedhi Maalitsa oshowo Desemba.

Omulumentu gumwe ota kongwa kopolisi sho a kwatele onkonga okakadhona koomvula 15 mondunda ye yokulala moGobabis.

Pokati komwedhi Desemba omukiintu gwoomvula 20 gwomOtjomuise okwa ningilwa omatilitho nombele na okwa nanena momulamba moka a kwatwa onkonga kaantu ye li yane.

Miipotha yilwe yomahepekathano gomomagumbo mbyoka ya lopotwa, omukiintu gwoomvula 38 okwa dhengwa noongonyo na okwa dhengwa woo momutse nemanya kohonda ye yoomvula 50, sha ningilwa popepi nomukunda Etunda moRuacana.

Omukiintu gwoomvula 25 natango okwa dhengwa nokukwatwa onkonga momukunda Ondudu, kohonda ye nale yoomvula, ndjoka ya tulwa miipandeko.

Mesiku lyahugunina gwomvula yo 2018, omunamimvo 24 okwa tulwa miipandeko miipotha yonkambadhala yedhipago sho a nkapa omukadhona gwe gwoomvula 19 nekatana nokumweehameka noonkondo.

Mesiku lyotango lyomvula ndjika, omulumentu gwoomvula 32 okwa tulwa miipandeko moMaltahöhe omolwa oshipotha shomuyonena gwomegumbo, sho a tsu nombele sigo omeso omukadhona gwe gwoomvula 31.

Momasiku gaali gaJanuari okwa tulwa miipandeko omulumentu gwoomvula 22 ta tamanekelwa oshipotha shekwatonkonga lya ningilwa mOshivelo. Otaku hokololwa a ponokele omukiintu noshiti na okwe mu kwata onkonga, ayehe mboka yaali oya li taya nwine pamwe pondingosho.

Otaku konaakonwa oshipotha shekwatonkonga momukunda Omakuva sho omukiintu a kwatwa onkonga kohonda ye yoomvula 22.

Momasiku 25 gaDecemba omukiintu gwoomvula 43 okwa tsuwa nombele na okwa kwatwa onkonga komulumentu ngoka a yaka po woo nongodhi ye yopeke. Omufekelwa okwa tulwa miipandeko.

Mesiku ndyoka natango, omukiintu iihumbata gwoomvula 35 okwa kwatwa onkonga komunamimvo 20 omanga a li molweendo lwe okuya kegumbo uusiku. Omufekelwa okwa tulwa miipandeko. Natango okwa patululwa oshipotha moHenties Bay momasiku 30 gaDesemba mokaomukiintu gwoomvula 72 akwatwa onkonga megumbo lye komulumenu ngoka a li e mu pula omeya gokunwa. Kape na ngoka a tulwa miipandeko.