Okanona ka tsu omumwayinagona nombele sigo omeso

TUYEIMO HAIDULA

EEKONDOMBALI



Nakusa okwa tumbulwa kutya oye Beverly Kazembua Muhenje.

Hekulu yaBeverly, Andreas Kashuku, okwa popi kutya shoka sha holoka oshi li oshikumwithi noonkondo mokukalamwenyo kwe kombanda yevi pomvul 89.

Okatekulu ke oka hulithile momake ge.

Kashuku okwa popi kutya oshiningwanima osha holoka mOmaandaha konima owala yomwiha.

Beverly okwa aniwa ta dhana ta pangele ombete onkulu.



Oontamanana.

“Aluhe okwa li iipyakidhila na iha vulu okukala kuutumba amwena. Mwayinagona okwe ya nduno puye na okwe mu ningi omashendjo na okwe mu pula ombele ndjoka a li ta longitha okuteta ihe okwa tindi. Otwe ya uvu taya nyenyeta kombinga yoshinima shoka na onde ya ganda,” Kashuku a popi.

Kashuku okwa popi kutya okwa li e sho oontamama odha hulu ihe okwa uvu ishewe taya nyenyeta.

Okwa popi kutya osha ningwa meendelelo na okuuvu Beverly ta kugu kutya okwa tsuwa. Kashuku ngoka iha vulu okweenda nawa na oku na woo uupyakadhi wokuuvako okwa mono Beverly ta tondoka ta tidha mumwayinagona, ngoka ta tondoka uuka mepya.

“Okwa yi owala oshinano oshishona na okwa gwile pevi. Onde mu kutha po na okwa li ta zi ombinzi oyindji noonkondo. Okwe mu tsu montulo kombinga yokolulyo. Onde mu tuka pokatalashe na onda kambadhala okumu pa ekwatho lyotango, tandi mu tumbu montulo noku mu pa ombepo kokana a fudhe,” Kashuku a popi.

Kashuku okwa popi kutya nonando okwa kambadhala ngaaka okwa mono kutya inashi kwathasha.

“Okwa tamene ta tanauna omeho ge nokwiinyengitha omagulu. Onda tala omifudho nde ihe odha kana po. Okwa yi. Omukwathi gwandje okwa yi,” Kashuku a hokolola.

Ewi lye olya gu pevi na okwa mwena po kashona.

Okwa tsikile ta popi kutya: “Oshili sho haku tiwa Kalunga oha kutha po mboka aawanawa. Beverly okwa li okanona kamwe hoka aluhe haka kwashilipaleke kutya onda nwa okofi ongula oshowo niimuna oyi li koshigunda. Olye ta kwathandje nomukulukadhi gwandje.”

Kashuku okwa popi kutya okamati lwanima oka adhika ka holama miihwa na sho keetwa megumbo okali ka ngwangwana kwaashoka sha holoka po. Okwa popi kutya opolisi oshowo aaniilonga aahungimwenyo oye ka kutha po ongula yEtiyali lwopotundi onti 7:00.

Beverly okwa li mondondo onti 4 poskola yedhina Eekondombali Primary School momukunda ngoka, omanga okamwayinagona keli mondondo onti ntatu.



Omakonaakono gopolisi

Omunambelewa omupopiliko gwopolisi moshitopolwa shaMuati, Titus Shikongo, okwa koleke oshingwanima.

Shikongo okwa popi kutya omufekelwa nanakusa oyali taya kondjele ombele yomukonda yahekulu ndjoka yali tayi longitha kunakusa pethimbo ndyoka.

Omufekelwa okwa yekeko ombele kunakusa na okwe mu tsu montulo kombinga yokolumoho nokumweehamena noonkondo.

“Nakusa okwa hulithile pehala lyoshiningwanima konima yoominute ooshona. Oshinangwanima osha ningilwa megumbo moka haya zi nahekulu oshowo yinakulu.”

Shikongo okwa popi kutya olutu lwaBeverly olwa falwa kopolisi yaKahao. Omufekelwa ngoka okwa yiwa naye kaahungimwenyo, nomakonaakono gopolisi otaga tsikile.

[email protected]