Ofamili ya kanithile omaliko gawo moshiponga shomulilo

Konima yomulilo ngoka gwa hanagula po egumbo lye alihe, omunamimvo 59 omuniilonga gwomegumbo okwa popi kutya oku na owala omukumo kutya otaka tungulula egumbo lye nokupingena po ndyoka lya pipo, mEsiku lyaCassinga omwedhi nguka.

“Inandi haluka we nenge nduuvite nayi andola molwaashoka kape na shoka tandi vulu okuninga,” Paulina Nihale ngoka ta gwanitha oomvula 60 muAguste a lombwele oNamibian Sun oshiwike sha piti.

Ombashu yaNihale yomala gatano oya pipo momasiku ga 4 gaMei nuumvo omanga a li ta nu otee megumbo lyamumwayina gomukiintu molukanda mOtjiwarongo.

Okwa popi kutya iinima mbyoka yi mu uvithe nayi ongaashi omambo goskola gokamonakadhona koomvula 14 oshowo omizalo dhoskola, oshowo onkalo kutya ngaashiingeyi okweedhiliwa kaantu.

Nihale okwa kala megumbo lye nokamonakadhona oshowo uutekulu utatu sigo Etine lyoshiwike sha piti.

Okwa kala megumbo lye ndyoka uule woomvula 25 , ndyoka ye a tungu po nomusamane gwe nakusa ngashiingeyi.

Okwa holola kutya nonando oku na omukumo gwokwiilongela ye mwene, otaka taamba omakwatho kehe ngoka ta pewa opo a vule okutungulula egumbo lye.

“Onda hala egumbo epe nonando oli na owala ondunda yimwe nenge mbali. Pamwe ope na ngaa ngoka ta vulu okukwathendje iinima yilwe ngaashi oombete molwaashoka oshidhigu okukala momagumbo gaantu.”

Muule woomvula okwe shi pondola okulanda konyala iipumbiwa ayihe ya pumbwa megumbo lye ngaashi ooskopa, otiivi, oombete, ookila dhokutalalela oshowo eshina lyokuyoga neshina lyokuhondja. Iinima ayihe oya kanena momulilo ngoka na okwa popi kutya itaka vula we okulikola iinima mbyoka.

Omulilo ngoka ogwa yonagula po woo oondokumende dhaakwanezimo ye adhihe.

Esiku a ningwa naye oonkundathana noshifokundaneki shika okwa popi kutya iikutu mbyoka a zala oshowo iikumbatha oye yi pewa kaasihenda.

Enyanyu lyaNihale pamwe nokamona oondyoka kutya okambishi kawo haka ithanwa Snoukie oka hupa momulilo.

Nihale okwa popi kutya ota dhimbuluka esiku ndyoka sho okamona koomvula 14 ka uvu kombinga yomulilo oka pula ngele okambishi kawo oka hupa moshiponga shoka.

Okwa popi kutya okamona hoka ka katalela po kOmbaye ngashiinyeyi okali ka limbililwa noonkondo sho kaya li ye wete okambishi kawo.

Ongula yesiku lya landula, Nihale okwa tokola opo a shune kegumbo lye ndyoka lya hanagulwa po komulilo nokukakonga okambishi kawo natango na okwe ka mono.

Monena Nihale ohaya zi megumbo lyomona gwosheeli .

Okwa popi kutya sho a thiki pegumbo lyesiku ndyoka iinima ayihe oya pyapo nale. Okwa popi kutya nonando muni okwali a tumu aanambelewa ye opo ya dhime omulilo ngoka, aanambelewa oya li ya thigi po ehala ndyoka molwaashoka aniwa aakwashigwana oya li ya geya sha etitha ya dhenge eloli lyokudhima omulilo nokutatula ekende lyokomeho. Aakwashigwana yaali oya tulwa miipandeko na oya mangululwa lwanima sho ya pewa omboloha. Nihale okwa popi kutya keshi shoka sha etitha ongeyo ihe ota fekele kutya ngiika aakwashigwana oya geye sho muni ina tuma mbala aanambelewa ye yokudhima omulilo.

Oonkambadhala okumona eyamukulo koshikondo shookadhimamulilo mondoolopa moka odha ponyo sho ongodhi yawo inayi yamukulwa.

Nihale okwa popi kutya okwa gandja omushangwa gwopambelewa kopolisi opo ku konaakonwe kutya omulilo ogwa etithwa koshike ihe okwa popi kutya ina mona eyamukulo natango kutya oshike sha etitha omulilo nonando otaku fekelwa kutya okaketha kolusheno hoka ka kulupa.

JANA-MARI SMITH