Nored ta nyokoma omalelo giitopolwa

KENYA KAMBOWE

Aanambelewa aakomeho yomalelo giitopolwa noondoolopa oya lundile ehangano ndyoka hali yandjakaneke olusheno monooli yoshilongo kutya otali ningi iimaliwa oyindji okuza kelanditho lyolusheno ihe ohali gandja uumaliwa uushona komalelo giitopolwa.

Aanambelewa aakomeho mboka inaya hala uukwatya wawo wu hololwe oya gandja omayele opo andola iilonga yaNored yi konaakonwe molwaashoka ehangano ndyoka inali pititha oolopota dhiiyemo okuza momvula yo 2013/14, nonando olya kala nokuninga iigongi yokomvula.

Oya popi kutya Nored ota mono iimaliwa oyindji okuza melanditho lyolusheno momahala ngoka ha longele nonando omalelo goondoolopa ogo haga wapaleke nokutula iikwaniipangitho pomahala ngoka.

Oyuuvite kutya oopresenda 33 dhiiyemo mbyoka haya mono okuza kehangano ndyoka kayi shi sha.

“Oolopota dhiiyemo yokomvula odha simana molwaashoka onga aakuthimbinga mehangano lyaNored otwa pumbwa okumona kutya iimaliwa yoshigwana ohayi longithwa ngiini,” omunambelewa gumwe ngoka e li omukuluntu gwelelo lyondoolopa lyontumba a popi.

“Nored ota koko kehe omvula omanga omalelo goondoolopa to a dha ge na oongunga odhindjidhindji, na itaga vulu okufuta oongunga ndhoka. Omalelo giitopolwa ogendji otaga hiila oombelewa omanga pethimbo lya faathana Nored ta landa iihauto yondilo nokutunga omatungo gondilo. Epulo oondika kutya ohaya kutha iimaliwa peni.”

Nored okwa totwa po momvula yo 2001 onga ehangao lyotango lyeyandjakaneko lyolusheno miitopolwa, ano regional electricity distributor (RED).

Ohali gandja olusheno kaakwashigwana yomiitopolwa ngaashi Oshana, Ohangwena, Omusati, Oshikoto, Zambezi niitopolwa iyali yaKavango.

Shoka osha landula sho okabinete momvula yo 2000 ka zimine opo ku totwe po omahangano gokuyandjakaneka olusheno miitopolwa.

Elalakano lyomahangano ngoka okutula pamwe iiyemo noku yi longitha mokwaandjakaneka olusheno ko kuvule okugandjwa olusheno kondando yopevi kaakwashigwana.

Namibia okwa topolwa miitopolwa itano mbyoka tayi pewa olusheno komahangano ngoka goREDs, ihe omahangano owala gatatu geli miilonga ga tumbulwa kutya oNored, Cenored oshowo Erongo RED.

Namibian Sun oku na uuyelele wiinekelwa kutya pethimbo lyomitumba dhokomvula dhaNored, aakuthimbinga mehangano ndyoka, ohaya pewa owala omauyelele giilonga.

Oonkambadhala okumona omauyelele goolopota dhiiyemo yehangano ndyoka okuza kepandja lyopaungomba lyehangano, odha ndopa, sho epandja ndyoka li na andola uuyelele mboka itali patuluka, na okuwetike kutya olya tulwa ko owala onga okuholola kutya ehangano olya pititha uuyelele mboka ihe hasho.



Oolopota dhiiyemo shomahangano omakwawo Erongo RED oshowo Cenored, sigo odhomomvula yo 2017 otadhi adhika komapandja gopaungomba gomahangano ngoka.

Okutameka Etine lyoshiwike sha piti, Namibian Sun okwa kala a tegelela okumona eyamukulo okuza komunambelewa omupopiliko gwehangano ndyoka Simon Lukas ihe omayamukulo ngoka inaga gandjwa sigo onkundana ndjika ya pitithwa.

Namibian Sun okwa pula kutya omolwashike Nored ina holola polweela oolopota dhe dhiiyemo okuza momvula yo 2015, 2016 oshowo 2017 na omolwashike ina tseyitha iiyemo nenge ekanitho ndyoka aningi muule woomvula dhihe ndhoka.

Nored okwa pulwa natango kutya monena okuna ookastoma ngapi, oshowo ngele oku na tuu owino kombinga yomaiyuvo gaakuthimbinga mehangano ndyoka.

Pethimbo kwa li a ningwa naye oonkundanana kuyele moRundu, Omunambelewa Omukuluntu gwehangano ndyoka, Fillemon Nakashole okwa li a popi kutya ehangano ndyoka kali lilepo okuninga iimaliwa ihe okugandja olusheno koshigwana.

Nored okwa li a holola aningi iiyemo yoomiliyona 49 momvula yo 2013/14 kohi yelelo lyaGotlieb Amanyanga.

Sho a pulwa kombinga yaakuthimbinga mboka kaya uvitile ombili Nored pamwe niilonga ye, na otaya pula yapewe iiyemo oyindji, Nakashole okwa popi kutya omalelo opo ga vule okuninga iiyemo yi li pombanda naga wapaleke omahala nokukwashilipaleka kutya omahala ngoka oge na aantu yo ya vule okumona iiyemo.

Nakashole okwa longitha ompito nokupandula elelo lyoshitopolwa shaMusati, kutya niiyemo mbyoka elelo hali mono okuza kuNored elelo otali wapaleke omahala moshitopolwa nokwiimonena iiyemo oyindji.