Natu shangeni ondjokonona yetu yene- Nujoma

Nujoma okwa li ta popi pethimbo kwa patululwa pambelewa Olufuko Festival mOutapi, ta ti ondjokonona noonkuluhedhi dhoshilongo nadhi kwatelwe po opo dhaadhike komapupi tage ya.

Okwa pandula Elelo lyOutapi oshowo oshiputudhilo shaUnam, sho ya ningi olopota yopailongo kombinga yOlufuko na okwa popi kutya olopota ndjoka otayi ka gandja ompito kAaNamibia opo ya vule okwiilonga ondjokonona yOlufuko.

Okwa ti shoka osha yooloka kondjokonona ndjoka ya shangwa kaatumwa yaEuropa , mboka ya gandja ethano lya yooloka na itali tsu kumwe nenenedhilaadhilo lyekalekepo lyoondjokonona noonkuluhedhi dhaavalelwa mo yaAfrika.

Nuumvo aakadhona ya thika po-79 oya kutha ombinga moshituthi shoka. Olufuko oshituthi shepitotanda lyaakadhona yoomvula 15 sigo 20 mboka taya longekidhilwa onkalo yuukiintu nokulongwa okulonga iilongadhalwa yopamuthigululwakalo ya yooloka.

Nonando Olufuko owa nyanwa kuyamwe, Nujoma ngoka e li patrona gwoshituthi shoka okwa popi kutya osha pumbwa okuhwahwameko nokuyambulwapo.

Nujoma okwa popi kutya oshilongo kashi na omuthigululwakalo osha fa omuti gwaana omidhi onkene omidhigululwakalo odha pumbwa okukalekwa po.

Ngoloneya gwaMusati, Erginus Endjala okwa yambidhidha omapopyo gaNujoma, ta popi kutya Olufuko oshinima sha simana kaanyasha naakokele oshowo moshigwana.

KENYA KAMBOWE