Nangy

Oku hole iihulo Omulumentu gwandje oku hole osexa noonkondo, kehe esiku okwa hala owala andola otatu yi miihulo. Mbela shoka oshi na uupyakadhi washike kuundjolowele wetu. Okuya miihulo nenge osexa ngaashi we shi popi kashina uupyakadhi washa ngele otamu yi muuhulo ya gamenwa ano tamu longitha ongumi opo mwiigamene kokuninga omategelelo inaga longekidhilwa oshowo okukwatwa komikithi dhohoni. Pauyelele wa gandjwa kaatseyinawa okuya miihulo okuli omukalo gwokuninga omadhewo, okushunitha pevi ondjele yombinzi ya londa, ostresa, ohayi kotheke nawa unene mboka haya kala ye na uupyakadhi wokukotha nawa na ohayi nkondopeke woo aakwiita yolutu, okutumbulapo owala omauwanawa gamwe po. Nonando nda tumbula omauwanawa ngoka, okuya miihulo ihaku kondjithilwa omuntu na oshi na okukala sha za komahalo gaantu ayehe, kutya omuli mondjokana ngele nena kuume koye ina hala mboka uuthemba we na owuna okusimanekwa, nena ngele owa yi miihulo noomuntu shaaheli pahalo lye ngaaka oshi li ekwatonkonga. Omathimbo gandje otaga limbilike Ohandi ehama noonkondo ngele tandi yi komathimbo, ngame ohandi zi woo omagwili ogendji noonkondo. Mbela uupyakadhi ouli peni? Omathimbo gomukiintu ohaga lunduluka omathimbo nomathimbo, nethimbo limwe uuna ga lunduluka itashi ti kutya omuntu oku na uupyakadhi. Uuna ombinzi yakala meni lyomukiintu ethimbo ele inayi pitamo nena ohashi etitha omathimbo gamwe opo ombinzi ndjoka yi zemo ya ninga omangwili naashoka ohashi etithwa komathimbo ngoka taga ende kashona woo. Omalunduluko goludhi ndoka momathinbo gaakiintu ohaga etithwa woo omathimbo gamwe uuna omukiintu a zi etegelelo, olutu lwe talu lunduluka ngaashi nando a gwedhako koshiviha she, e na uupyakadhi mboka hawu ithanwa ‘Uterine fibroids’, ha longitha omiti dhontumba nenge tayi momenopause okutumbulapo owala yimwepo. Itashi ti nee ngele owiiyadha nuupyakadhi mboka ino ya koshipangelo ihe mboka uuyelele owala nde kupe kutya olundji oshike hashi etitha omaupyakadhi goludhi ndoka. Owa pumbwa oku ka mona omundohotola gwaakiintu opo e ku ningile omakonaakono ye a mone kutya uupyakadhi woye oweetithwa koshike. Otandi ningi etegelelo mbela? Ondi na oomvula o-16 na onda yi miihulo ku na owala esiku limwe ndi ye komathimbo. Inatu longitha ongumi, mbela otandi vulu oku ninga etegelelo? Omolwashike wu na oku mana po ethimbo lyoye nokuya miihulo omanga wu li mepupi lyoomvula oonshona? Owali wa pumbwa andola wiitulamo miilonga yoye yoskola ito dhilaadhila nokuli andola okukala naalumentu molwaashoka owa tegelela owala oku ninga etegelelo inali longekidhwa ngaashi wa limbililwa nale ngaaka nenge wu kwatwe komikithi dhohoni woo. Kombinga yepulo lyoye ngele oto vulu oku ninga etegelelo uuna wa yi miihulo ku na owala esiku limwe wu ye komathimbo, eyamukulo o eeno. Oto vulu okuninga etegelelo kehe ethimbo ndyoka toyi miihulo inayi gamenwa onkene kwashilipaleka kutya kehe ethimbo omwa longitha ongumi, ihe itandi popile nando e yo lyoye miihulo omanga wu na oomvula ndhoka. Thiga po omulumentu ngoka molwaashoka ke na nonkalamwenyo yoye ngele nani naye ota zimine muye miihulo inayi gamenwa nookuli. Keholendje Ondina omulumentu gwandje twa kala na ye ethimbo ele ihe ke holendje we, nandi ninge ngiini? Omuholike gwoye ke kuhole eku lombwele nenge owe shi mono ngiini? Oshinima shimwe tu na okutseya nokutaambako nonando shi kale oshidhigu oshoka kutya ohole iha yi kondjithilwa omuntu, nonando wu kale wu wete kutya omuholike gwoye wu mu hole unene na ito vulu okutopoka naye ihe ye ke kuhole nena ku na shoka to vulu okuninga. Onawa muye moonkundathana nomuholike gwoye e to mu pula ngele okuna tuu ehalo oku tsikila nangoye na ngele oku kuhole opo wu uve omadhilaadhilo ge molwaashoka ethimbo limwe otashi vulika wutye omuntu ke kuhole wa tala owala komaihumbato ge ihe nani omadhilaadhilo goye ka ge li mondjila. Uuna mwa kundathana naye e ta holola kutya ke na we ehalo lyokukala nangoye shoka itashi ti kutya ehulilo lyuuyuni. Otashi ku uvitha nayi shili ihe taambako owala onkalo e to pula komeho nonkalamwenyo yoye na ondiinekela kutya oto ka mona omulumentu eku hole shi vulithe oku kala mekwatathano lyohole nomuntu ke ku hole.