Namibiërs sweet by Rooster-spele

Evany van WykTwee Namibiërs het onlangs hul land by die internasionale Virgin Active Rooster-spele in Suid-Afrika verteenwoordig. The Zone het met die topfikse Damian Muller (21) en Romi Ihms (28) gesels voor hul vertrek na die geleentheid wat op 1 Junie gehou is. Virgin Active-lede van Suid-Afrika, Namibië, Botswana, die Verenigde Koninkryk, Italië, Singapoer, Thailand en Australië het aan die kompetisie deelgeneem. Die Rooster-spele behels 'n stel van agt oefeninge wat binne vier minute voltooi moet word. Elke oefening moet volgens 'n spesifieke tegniek uitgevoer word en elke deelnemer moet tien keer elke oefening doen. Beoordelaars sien toe dat die korrekte bewegings uitgevoer word en hou telling. Die deelnemer met die beste tye vorder na die volgende ronde.Muller is ‘n trotse Namibiër wat in Windhoek gebore is. Volgens hom was hy van kleins af 'n aktiewe individu. Op die ouderdom van 13 het hy begin met opleiding by BRG biokenetika in Windhoek en dit het sy fiksheidsleefstyl bepaal. Muller het gesê sy pa was nog altyd sy grootste motiveerder en rolmodel. “Van 'n voorbeeldige pa tot 'n verstandige vriend; hy was werklik my alles-in-een.” Sy beste vriend het die Rooster-uitdaging gedoen en hom aangeraai om dit te probeer. “Soos hulle sê, die res is geskiedenis,” het Muller gesê. Die moeilikste deel van die kompetisie was dat daar geen rustyd tussen die oefeninge was nie. “Dit is nie net 'n fisiek veeleisende kompetisie nie, maar 'n geestelike een daarby,” het Muller gesê. Sy boodskap aan voornemende deelnemers is dat niks wat die moeite werd is maklik is nie, en niks wat maklik is die moeite werd is nie.Ihms is in Suid-Afrika gebore en het daar grootgeword. Sy het lang tydperke in haar lewe in Namibë deurgebring toe sy vir familie kom kuier het. “Ek was nog altyd vrek lief vir Namibië en het elke jaar kom kuier,” het Ihms gesê. Sy het sewe jaar gelede Namibië toe getrek, waar sy haar man ontmoet. Volgens Ihms was sy nog altyd sportief, en soos sy ouer geword het, het sy al hoe liewer daarvoor geword. Sy moes die kompetisie met ‘n kniebesering aandurf en sê dit was haar grootste struikelblok daartydens. Haar raad aan jong mense is om altyd jouself as jou grootste kompetisie te sien. “Ek is beslis nie so sterk of fiks soos van die ander deelnemers wat verlede jaar gewen het nie, maar ek wil elke oomblik geniet,” het Ihms gesê. Haar grootste motivering is die begeerte om die beste moontlike weergawe van haarself te wees.Alhoewel die twee Namibiërs nie die semifinale ronde van die kompetisie gehaal het nie, is hulle baie dankbaar vir die blootstelling en ongelooflike ervaring. “Dit was ‘n fenomenale ervaring wat ek nooit sal vergeet nie, en waar ek baie lesse geleer het,” het Muller na die kompetisie gesê. Pretfeite oor Damian MullerHy sing en dans na willekeur, enige tyd, enige plek.Sy aandag word maklik afgelei deur 'n verbygaande hond of 'n baie mooi motor.Spinnekoppe en vlieënde gogga's laat hom skree.Pretfeite oor Romi IhmsSy eet elke dag donkersjokolade.Sy is gek oor kosmaak.Sy het ‘n vrees vir miere.

Namibiërs sweet by Rooster-spele

Comments

Namibian Sun 2025-07-08

Please login to leave a comment

Namibiërs sweet by Rooster-spele

Comments

Namibian Sun 2025-07-08

Please login to leave a comment

Login