LPM a popi kombinga yuumbanda welelo lyuukwiita moshilongo

JEMIMA BEUKES

Ongundu yoLandless People’s Movement (LPM) oya limbililwa kutya Namibia otayi melelo lyuukwiita.

Ongundu oya popi kutya pe na ompumbwe opo Iigwana yaHangana yi ninge omakonaakono omolwa aakwiita mboka ya tulwa mokati koshigwana nokukala taya patolola omahala gamwe po gaakwashigwana.

Omupopiliko gwoLPM Utaara Mootu okwa popi kutya etokolo lyepangelo okutula aakwiita moshigwana shalandula etulo miilonga lyOperation Hornkranz oshowo Operation Kalahari Desert, olya pumbwa okukonaakonwa.

Operation Hornkranz olya li epatololo lyomahala gaakwashigwana ndyoka lya ningwa pokati kaakwiita yoNamibian Defence Force (NDF) oshowo Opolisi yaNamibia, na olya tulwa miilonga muDesemba onga omukalo gwokuyanda iimbuluma nekanitho lyoomwenyo oshowo omaliko pethimbo lyiituthi yomatango omanene.

Epatololo ndyoka olya landulwa ishewe kwaandyoka tali ithanwa Operation Kalahari Desert, ndyoka tali ningwa miitopolwa melongelokumwe noNDF, Opolisi yaNamibia, Opolisi yoshilando shaVenduka oshowo aanambelewa yomatembu.

“Otwa pumbwa okupula kutya ngele NDF oshowo Opolisi otaya gamene tuu shili oomwenyo dhetu ngele oyo taya hwahwameke omiyonena. Gumwe ota feleke kutya omiyonena ndhoka otadhi ningwa moshigwana nokwiigwilililwa oshigwana nokonima otadhi ka kala oshinima shesiku kehe.”

Aakwiita otaya nyenyetwa kutya otaya ponokele nokudhengagula aakwashigwana kohi yedhina kutya otaya kalekepo ompango nelandulathano.

Okwa holoka oolopota dhaakwashigwana ya ponokela nokweehamekwa kaakwiita, mwakwatelwa olopota yomukiintu ngoka a dhengwa noonkondo mOvenduka, nokweetitha eehamekwe momutse, sha ningilwa pondunda yomanwino moshilando.



Okwa holola woo okavidio komukwiita ta ponokele nomalaka omukiintu nokumuula kutya “I will f**k you up”.

Omunongononi gwonkalo yopolotika, Ndumba Kamwanyah okwa popi kutya omapulo ngoka ga pumbwa okupulwa okutya ngele opolisi otayi ndopa okukondjitha iimbuluma.

Okwiinekela woo kutya uumbanda waantu inawu pumbwa okwiidhimbikwa nokugandja oshiholelwa kutya Namibia okwa zi melelo lyopolisi pethimbo lyoomvula dhuukoloni.