Kundathaneni kombinga yomilalo naanona yeni-Hamatwi

ILENI NANDJATO

Omunambelewa omukomeho gwelongo moshitopolwa shaHangwena, Isak Hamatwi, okwa pula aavali opo ya kundathane naanona yawo nokupopya kombinga yiikumungu yomilalo opo ku yandwe aanona taya dhigipo omanongelo omolwa omategelelo.

Hamatwi okwa popi kutya oshindji shoka tashi etitha omategelelo maanona yoskola, okuya miihulo naalumentu aakokele moka mwa kwatelwa aalongiskola.

Hamatwi okwa li ta popi pethimbo lyomutumba gwaanyasha naavali ngoka gwa ningilwa mEtitano mondoolopa yEenhana, gwa nuninwa okukundathana iikumungu ya pamba aavali naanysha.

Okwa popi kutya nonando okwa tulwa miilonga omulandu gwelongo ngoka tagu yanda eningo lyomategelelo mokati kaanaskola, ondjele yaanona yoskola taya ningi omategelelo oya londa pombanda noonkondo.

Konyala aanaskola ye li po 200 oshowo aanyasha mboka ihaya yi kooskola pamwe naavali ya za momidhingoloko dha yoloola moshitopolwa shaHangwena, oya kala momutumba moka nokukundathana iikumungu ya guma aanaskola oshowo aavali.

Omutumba ngoka oguunganekwa koStar for Life neyambidhidho lyiiyemo okuza koUnesco kohi yoontentekelihapu ‘Don’t raise your voice, raise your argument’. Omutumba ngoka ogwa kaliwa woo kaakuthimbinga oyendji moshikondo shelongo.

Omunambelewa ngoka okwa popi kutya aanaskola unene yaakadhona oya taalela oshiponga shokuthigapo ooskola omanga inaya manitha omailongo gawo, naashoka otashi etithwa komategelelo ngoka ga londa pombanda mokati kaanaskola.

Hamatwi okwa tsikile kutya epangelo olya tula miilonga omikalo ndhoka dha nuninwa okusitha uunye aanaskola unene aakadhona naanaskola mboka ya za momidhingoloko ndhoka dha kala inadhi talika nale opo kaya thigepo ooskola.

Hamatwi okwa nyana woo omulandu ngoka tagu indike aalongiskola yay e momakwatathano gopahole naanaskola,ta popi kutya kakele komulandu ngoka, kape na omulandu ngoka tagu geele mboka taya gandja omategelelo kaanaskola.

Omunambelewa omukuluntu gwooprograma moshikondo shuundjolowele moshitopolwa shaHangwena, Festus Kuushomwa, okwa kumike nokutsa omukumo aavali naanaskola opo ya kundathane kombinga yomilalo.

Aanyasha naavali oya yi mookundathana ndhoka ya popi kutya odhe ya longo oshindji sho aavali yawo ya ndopa okukundathana iinima yoludhi ndoka nayo.

Oyendji oya popi kutya inaya mono ompito yokukundathana nenge okupopya naavali yawo iikumungu yi na sha nomilalo molwaashoka aavali ohaya geye noonkondo ngele ya mono ye li naalumentu.



Menindjela gwoStar for Life moshilongo, Susan Linosi okwa popi kutya otaya kambadhala okunkondopeka aanyasha opo ya dhidhilike oondjodhi dhawo nokukala aakwashigwana ye na oshilonga moshigwana. Okwa popi kutya ohaya yi kooskola nokutsomukumo aanaskola ya a dhe oondjodhi dhawo nokwaadha omalalakano gawo monkalamwenyo.

“Ohatu ya pe omayambidhidho kehe taya pumbwa opo ya tsikile ooskola dhawo nokwaadha oondjodhi dhawo,” Linosi a popi.

Okwa popi kutya oonkundathana pokati kaavali naanyasha oshinima hashi ningwa kehe omvula okutameka momvula yo 2014, sho sha li sha ningilwa tango moRehoboth, na odha nuninwa okweeta pamwe aanyasha naavali opo ya kundathane iinima mbyoka ye ya pamba.