Kazapua a popi kombinga yelelo lyoshilando

OGONE TLHAGE

OVENDUKA

Pokati komvula yo 2014 no 2019 elelo lyoshilando ndyoka lya kwatelwa komeho kuKazapua olya taalele oonkugo okuza koshigwana omolwa ompumbwe yevi sha landulwa woo koonkambadhala dhomaikuthilo gevi.

Mayola ngashiingeyi gwoshilando, Job Amupanda okuza kehahwameko Affirmative Repositioning ndyoka lya li lya hwahwameke eikutho lyevi momwedhi Novemba mo 2014, oshiwike sha piti okwa popi kutya kashi shi oshipu okukwatela komeho elelo lyoshilando, shoka Kazapua a popi kutya ngashiingeyi oye shi wete kutya oshipyu ngiini.

Moonkundathana dhoka a ningwa naye koNamibia Sun mehuliloshiwike Kazapua okwa popi kutya elelo lyoshilando li li koshipundi olya uvaneke tali ka gandja evi kaakalimo ihe kali na shoka lya gwanithwapo sigo onena momauvaneko ngoka ga ningwa.

“Ngele wu li pondje oshipu okugandja uusama kwaamboka ye li meni molwaashoka ku shi shi kutya oshidhigu ngiini. Oya li ya popi kutya otaya ka longa hwepo na oye na ompangela dhokugandja evi. Pethimbo lyetu mboka ya ningitha iilonga yetu iidhigu.” Mayola nale a popi.

Mayola nale okwa popi kutya elelo li li koshipundi itali vulu okugandja uusama kopolotika mendopo okugandja evi.

“Pethimbo lyetu opwa li woo opolotika nookansela yamwe melelo oyo ya kwatele komeho omahwahwameko gokwiikuthila evi.”

Kazapua okwa popi woo kutya ookansela yamwe melelo otaya inomene oopoloyeka dhoka ya adha dha tamekwa nale kelelo ekulu.

Okwa gandja omayele kelelo li ninge omapulaapulo gomuule kombinga yoompangela mokugandja evi.

“Otwe shi pondola okuya moshipala eikuthilo lyevi molwaashoka otwa pula omayele gomuule na otu na ekwatathano ewanawa nookuume ketu miilonga ngaashi ookansela miitopolwa yilwe oshowo opolisi, otandi ya pe omayele ya ninge ngaaka woo.”

Omanga inaya koshipundi AR okwa li e wete kutya egandjo lyevi otali ka kala oshinima oshipu mokukandula po uupyakadhi wevi moshilando ihe konima yoomwedhi hetatu oshipundi shoka oshipyu noonkondo.

Oshiwike sha piti, Amupanda okwa zimine kutya kashi shi oshipu.

Oshifokunadneki shika osha popi naanongononi yopolotika yaali.

Ndumba Kamwanyah okwa popi kutya ethimbo elelo ndyoka lya kala koshipundi ehupi unene nokumona kutya olya ndopa.

Okwa popi kutya oomwedhi hetatu odha gwana owala okwiilongekidha nokutula ayihe pomahala.

Phanuel Kaapama, okwa popi kutya omu na etopoko melelo ndyoka, tashi ningitha oshidhigu okutula miilonga omilandu.

Opolisi yaNamibia oshiwike sha piti oya kutha olunyala momananathano pokati kelelo lyoshilando nomukomeho gwopolisi yoshilando, Abraham Kanime.

Pethimbo ndyoka Amupanda okwa pula oshigwana niilyo yopolisi mbyoka ya gwanitha po iipumbiwa opo yi ninge omaindilo.

Omukomeho gwopolisi, Sebastian Ndeitunga okwa pula iilyo yopolisi yi ninge omaindilo, ihe okwa popyulula konima sho hahende gwaKanime, Sisa Namandje a shanga omukanda ta kunkilile kutya shoka kashi shi oshinakugwanithwa shopolisi.

Okomitye yi na iilyo yEtanga lyOpolisi oshowo Namibia Central Intelligence Service oya pewa oshinakugwanithwa shokuyambidhidha oshilando molukongo lyomukomeho omupe gwopolisi yoshilando.

Ndeitunga okwa popi kutya opolisi inayi hala okukutha ombinga molugodhi ndoka na otayi ikaleke kokule manga.

“Oya taalelitha oondjembo dhawo komuntu a puka. Otwiikutha mo manga moshikumungu shoka. Otwa tegelela yetu galukile,” Ndeitunga a lombwele oNamibia Sun.

Ngoka ta longo pehala lyomunambelewa omukuluntu gwoshilando, George Mayumbelo, sho a ningilwa omapulo okwa popi kutya elelo inali kaleka ekuto ndyoka nonando opolisi oyiikuthamo.