Kashi shi omuthigululwakalo gwetu- Aanesi

TUYEIMO HAIDULA

ONESI

Aakwashigwana yomOnesi moshitopolwa shaMusati oya popi kutya itaya popile etulo miilonga nezimino lyokukuthamo omategelelo molwaashoka omuthigululwakalo gwawo otagu shi pitike.

Okwa ningwa omutumba gwaakwashigwana kokomitiye yoparliamentary standing committee on gender equality and social development.

Namibia ota ningi oompata dhopashigwana kombinga yetulo miilonga nenge etindo lyokupitika okugandja uuthemba wekuthomo lyomategelelo ngoka inaga halika.

Mosub-Sahara Africa, South Africa oye owala a tula miilonga uuthemba mboka. Nonando ongaaka omakuthomo gomategelelo inaga gamenwa omayovi nomayovi otaga ningwa kehe omvula naakiintu ya thika po 30 000 otaya hulitha kehe omvula onga oshizemo shomakuthomo gomategelelo.

Andreas Hamunyela, omunashipundi gwUukolonkadhi Traditional Authority, okwa popi pethimbo lyomutumba ngoka kutya omuthigululwakalo gwawo itagu pitika etulo miilonga lyoveta ndjoka.

Okwa popi kutya yo oya kulupa na oya tegelela aanyasha ya kutheko iinakugwanithwa, nenge ya kale ye na aantu mboka taya vulu okutuma momagumbo.

Okwa popi kutya ngele oveta ndjoka oya tulwa miilonga nena otashi keetitha nooskola dhi pate molwaashoka itapu kala aanona.

Okwa popi kutya ngele aakiintu inaya hala okuinga omategelelo naya longithe oongumi nenge ya ka konge omakwatho gomaluvalo ga longekidhwa.

Komanda gwosasiyona yopolisi mOnesi, Warrant Officer Jeremia Kamati, ke na omiyalu kombinga yomakuthomo gomategelelo ihe olya li ya lopota oshipotha shimwe momvula yo 2011.

Kamati okwa popi kutya ita popile oveta ndjoka yi tulwe miilonga nomatompelo kutya omwaalu gwaakwashigwana otagu ka shuna pevi.

Andreas Amukwa, mwene gwomukunda Oshitumbe, okwa popi kutya ekutho lyomategelelo itali pitikwa moshikandjo shawo. Okwa holola kutya nale ngele omukiintu okwa ningi etegelelo ina hokanwa okwa li ha hwikwapo, naakiintu nale oyali ha ya ka konga uuholameno mUukolokadhi moka ya li haya kwathelwa.

Okwa tsikile kutya itaya vulu okuzimina oshinima shoka omanga nale hali haya yambidhidha okuhupitha uunona.

Amukwa okwa popi kutya aakiintu mboka taya kuthamo omategelelo kaye na ongushu na otaya vulu ya kala itaya mono we uunona ngele omategelelo oga kuthwamo kashi li mondjila.

Kansela gwaNesi Festus Petrus naye okwa popi kutya elelo lyUukolonkadhi itali popile omakutho gomategelelo molwaashoka kashili pamuthigululwakalo gwawo.

Okwa popi kutya omwaalu gwaakwashigwana moshilongo omushona nongele okwa pitikwa ekuthomo lyomategelelo nena omwaalu itagu ka londa pombanda.