Kapia ta nyenyeta sho elelo lyaShana inali vula okumona omuprima

Kapia, ngoka a li woo nale omuleli gwewawa lyaanysha mongundu yoSwapo okwa popi kutya ita hala okwiitaala kutya elelo lyaSwapo ngashiingeyi olya yooloka kelelo ndyoka a li a longele nale, ta popi kutya epangelo pethimbo ndiyaka olya li lyaantu.Metiyali lyoshiwike sha piti, elelo lyoshitopolwa shaShana olya ningi omutumba gwa nuninwa okukundathana onkalo yopaulumomhubwe ndjoka ya taalela oshitopolwa oshowo oonkundathana dhopashigwana nehangano lyoNamibia National Farmers Union (NNFU), opo ku kundathanwe onkalo yoshikukuta. Omunambelewa Omukuluntu gwelelo lyoshitopolwa shaShana, Marthin Elago okwa lombwele aaakuthimbinga momutumba ngoka gwa ningwa kutya oshitopolwa osha taalela onkalo ondhigu yoshikukuta na otayi gumu nayi aantu niinamwenyo.Elago okwa popi kutya onga dhimwe dhomoompangela dhoshitopolwa, elelo lyoshitopolwa shaShana olya tokola okutuma osheendo shaanambelewa okuza moshitopolwa , opo ya fale olopota yawo yonkalo yoshikukuta komuprima Kuugongelwa-Amadhila oshowo !Naruseb.Elago okwa popi kutya omolwa iinakugwanithwa yawo oyindji omuprima oshowo minista inaya vula okumonika. “Konima sho twa ningi etokolo okuya kOvenduka opo tu ka tsakanene naaleli mboka oshikakomvula shetu shopaiyemo osha thiki pehulilo. Omolwa uupyakadhi wopashimaliwa inatu vula okuya molweendo pehulilo lyaMaalitsa. Sho Apilili a thiki opwa li pe na iinakugwanithwa oyindji ngaashi edhimbuluko lyEsiku lyEmanguluko, etulo miilonga lyomahwahwameko gopashigwana gokuwapaleka oshowo efumbiko lyomukwaniilwa gwaNdonga, naaleli mboka oya kala yiipyakidhila noonkondo na inatu vula oku ya mona,” Elago a popi.“Konima otwa lombwelwa opo tu kwatelemo ngoloneya gwetu omupe oshowo aanafaalama mosheendo shetu. Natango otwa pewa ishewe omayele tu ye pamwe noshitopolwa shopuushiinda wetu, Omusati, opo tu gwedheko ongushu ketalelepo lyetu. Oongoloneya yaali yiitopolwa mbyoka oya zimine na otaya kongo ompito ngashiingeyi yokuninga oshilage naaleli mboka, molwaashoka aaleli mboka oyiipyakidhila noonkondo nethimbo kehe to ningi ekwatathano nayo oto lombwelwa kutya oyiipyakidhila.” Kapiya, ngoka a li oshitopolwa shaamboka ya kutha ombinga momutumba ngoka gwa ningwa, okwa popi kutya ita hala okwiitaala kutya elelo lyoshitopolwa inali vula okumona aaleli mboka kombinga yoshikumungu shoka sha simana noonkondo. “Onda li tandi dhilaadhila kutya epangelo olyaantu, na otali pulakene kaantu. Mbela epangelo lyoomvula dho 1990 olya yooloka kepangelo lyomomvula yo 2019, nenge omolwashike ngashiingeyi aaleli yetu yopashigwana kaye na ethimbo okutsakanena naakwashigwana opo ya kundathane iikumungu mbyoka ya guma oshigwana?” Kapiya a pula.“Shoka itashi vulu okukala omaipopilo pethimbo lyonkalo yi li ngaaka molwaashoka omuprima minista okwa li a yi kOmauliko gIipindi mOndangwa na inamu vula okumona ompito mu kuutumbe naye omanga ina tameka oshituthi shomauliko mu popye naye kombinga yonkalo yoshikukuta nenge mu ninge oshilge naye.”ILENI NANDJATO

Kapia ta nyenyeta sho elelo lyaShana inali vula okumona omuprima

Comments

Namibian Sun 2025-06-19

Please login to leave a comment

Kapia ta nyenyeta sho elelo lyaShana inali vula okumona omuprima

Comments

Namibian Sun 2025-06-19

Please login to leave a comment

Login