Kansela a kaleke ekuto miilonga lyaNamWater koKalkfeld

Kansela gwoshikandjohogololo sha Otjiwarongo, Julius Neumbo mEtiyali okwa yi moshipala ekuto miilonga lyaNamWater ndyoka lya ningilwa koKalkfeld mOshitopolwa shaTjozondjupa omolwa efekelo lyuulingilingi.Ehangano lyoNamibia Water Corporation (NamWater) mesiku lyotango lyomwedhi nguka olya tseyitha kutya oli na oompito dhiilonga dhaantu ya thika o-20 mboka taya ka pumbiwa opo ya ka fule omikanka dhominino dhomeya nokudhifila.Okwali ta kupumbiwa aantu ye na ontseyo mokulongitha omashina yeli yatatu oshow aahongi yiipilangi yaali, naashika osha etitha oompito dhi ye sigo opaantu 25.Opoloyeka ndjoka oya nuninwa okufula omunino gwomeya gokunwa okuza mofaalama yepangelo yaRodenhof okuya kolukalwa lwaKalkfeld uule woshinano shookilometa 15.Ekuto miiilonga ndika olya li li na okutameka mEtiyali poKalkfeld ihe Neumbo okweli yi moshipala manga inaali tameka. Neumbo okwa popi kutya okwa nothelwa ko kaakalimo yomofaalama ndjoka kutya oonakuninga omaindilo ya thika paantu 20, aapambele yaaniilonga yoNamWater mboka ya ende okuza kiitopolwa ngaashi Khomas, Erongo nOshana opo ya kuthepo oompito ndhoka. Iilonga otayi pula oonaku indila iilonga ya kale ye na ondondo onti-10 noye na woo uukolele.“Itatu ka pitika aantu ya za kiitopolwa yimwe ya longepo iilonga yokuundula uutololi nokufula ominino ngele otu na omwaalu omunene gwaanyasha kaye na iilonga mehala ndika,” Neumbo a popi.Okwa pula NamWater opo a kaleke ekuto miilonga ndyoka, naamboka ya za kiitopolwa yilwe oya monika yiithikamena ye na omitsalo dhawo. Kansela okwa pula opo ekuto miilonga ndyoka li tamukulule na okwa pula opo aanambelewa okuza mombelewa yelelo lyolukalwa ndoka yakalepo wo.Okwa pula opo uukalata womahogololo wu longithwe noombapila dhokugana okuza kopolisi opo ku kwashilipalekwe kutya oonakuninga omaindilo aakalimo shili yomolukalwa ndoka.Konyala aanyasha yomoKalkfeld ya thika po-100 oya kala pehala mpoka ya hala okupe wa iilonga.Omunamimvo 35 Loretha Kharuxas okwa lombwele oNampa kutya ye omukalimo gwomoKalkfeld na okwa thiki pehala mpoka pwali tapu kutilwa aantu lyopotundi onti-05:00 mEtiyali.Okwa popi kutya okwa adha aantu yalwe aakongi yiilonga ya za koondoolopa dhilwe ya thika po-20 ya lala motenda.Fillipus Hipondoka, ngoka naye e li omukalimo gwomoKalkfeld okwa popi kutya ye ota vulu okulonga iilonga ayihe mbyoka tayi longwa, na okwa pula opo ku talike tango aakalimo yomomudhingoloko.Omunambelewa gwoNamWater mombelewa yaKalkfeld, Jimmy Asser okwa popi kutya ngoka omalundilo taga ningwa na okwa tindi okutya sha.Okuya pehulilo lyesiku, inaku monika uuyelele ngele NamWater osho a tsikile nekuto lye miilonga nenge ahawe. NAMPA

Kansela a kaleke ekuto miilonga lyaNamWater koKalkfeld

Comments

Namibian Sun 2025-09-16

Please login to leave a comment

Kansela a kaleke ekuto miilonga lyaNamWater koKalkfeld

Comments

Namibian Sun 2025-09-16

Please login to leave a comment

Login