Itatu vulu okwiinekela Ngiwete- NSFAF

JEMIMA BEUKES

Pethimbo a kuthwa miilonga nondjambi ye yuudha, Nghiwete okwa kaIa ta mono ondjambi ye yooN$185 000 komwedhi oshowo oomiliyona 1.8 dhoka a mono kehe omvula omanga ina gandja eyakulo lya sha koshiketha shoka. Sha landula etsokumwe lyompangu yaaniilonga, oshiketha osha futu oshimaliwa shoomiliyona ndatu, miifuta yokonima.

Pahapu dhoshiketha shoNSFAF, Ngiwete ina kutha ombinga momakonaakono ngoka ga li ompito yokuyeleka edhina lye okuza komalundilo ngoka ta ningilwa. Nghiwete okwa taalele omapangulo miinima ngaashi elelo lyuuhasha nendopo okuholola uumwene nohokwe nokwiidhopa miilonga yoshikondo shina sha nokulanda nokumona omayakuo moshiketha shoka.

Ompangu yoPombanda momasiku 28 gaJanuari 2022 oya pulakene keindilo lya ningwa koNamibia Students Financial Assistance li li ompinge neshuno miilonga lyaHilya Nghiwete onga omunambelewa omukuluntu gwoshiketha shoka.

Moombaapila dhompangu, oshiketha osha popi kutya mompangu yaaniilonga, omupotokononi ina tala komaumbangi ngoka ga gandjwa pethimbo sho a pula eshuno miilonga lyaNghiwete.

Omaumbangi ngoka ongaashi omalweendo gopaigwana gaNghiwete, ngoka a ningi pethimbo mpoka e na uupyakadhi wopamadhilaadhilo na ita vulu okuholoka komitumba dhokupulakena omatamaneko ngoka ta ningilwa.

Ompangu yaaniilonga oya li yuutha eshuno miilonga yaNghiwete konima sho omupotokononi a mono kutya okwa kuthwa miilonga shaaheli pauyuuki.

Nghiwete okwa tidhwa miilonga muFebruali gwomvula ya piti, sha landula ekutho lye miilonga okuza muApilili gwomvula yo 2018 ta lundililwa elelo lyuuhasha.

Momukanda gwompangu gwomapandja 45, NSFAF ota popi kutya Nghiwete okwa kateke omulandu gwomitumba dhomautho nonando okwa li a tseyithilwa nale.

Okwa li a tseyithilwa kombinga yomutumba ngoka komunashipundi gwelelo pamushangwa.

Okushininga pauyuuki, oshiketha osha popi kutya otashi ka gandja kuye omusholondondo gwiipotha ayihe ta tamanekelwa sha landula omakonaakono ngoka ga ningwa ku na iiwike itatu opo iilongekidhe.

Oshiketha osha popi kutya okuza petameko Nghiwete okwa kala ita longele kumwe, tuulike odhino yelelo lyoshiketha ndyoka li li omugandji gwe gwiilonga na okwa ndopa okuyamukula komukanda gwa shangwa momasiku 26 gaApilili momvula yo 2018, ngoka a pewa momasiku 30 gaApilili 2018.

Momasiku gaali gaMei 2018, Nghiwete okwa yamukula koshiketha shoka ta popi kutya ina taambako iipotha mboka molwaashoka omukanda ngoka inagu shainwa nonando okwa pewa etumwalaka okuza kuamushanga gwoshiketha kutya otaka pewa omukanda gumwe.

NSFAF okwa longekidha omutumba gwomautho momasiku gaheyali gaMei omvula ndjoka konima yomasiku gaheyali sho a pewa omukanda ngoka tagu holola iipotha mbyoka ta tamanekelwa ihe omutumba ngoka oguundulilwa komeho, sho Nghiwete a pula opo a konge omukalelipo gwopaveta.

Okwa pewa epitiko, nonando kali a pitikwa okukala nomukalelipo pethimbo ndyoka.

Konima yomwedhi pokati ka June naAguste gwo 2018, Nghiwete okwa li a hiwa opo a kuthe ombinga momakonaakono ga ningwa koKPMG.

Momasiku 29 gaJune 2018 okwa tseyithilwa kaakonaakoni kutya oya hala oku mu ningila omakonaakono momasiku gane gaJuli, nopehala lyokuzimina, Nghiwete okwa pula opo ya kale omutumba momasiku 12 gaJuli ya kundathane uukwaveta weindilo ndyoka.

Nonando ongaaka Nghiwete okwa ndopa okuholoka momasiku 12 gaJuli nomomasiku 17 oohahende dhoshiketha odhe mu shangele omukanda, na hahende gwaNghiwete a yamukula momasiku 18 tadhi pula opo ku gandjwe okondalaka pokati kongundu yoKPMG noshiketha , ta holola kutya opo owala taka holoka ngele a pewa omukanda ngoka.

NSFAF okwa gandja okondalaka ndjoka momasiku 27 gaJuli 2018, ihe Nghiwete ina yamukula sigo omesiku lyotango lyaAguste 2018 sha landula edhimbulukitho okuza kuNSFAF.

Oshiketha shoka osha gwedhako kiipotha yaNghiwete okwaahena uukwashili momasiku 20 gaSepetemba gwo 2018 oshowo okuya pondje etsokumwe lyiiholekwa.

Omutumba gwomautho ogwa longekidhwa gu kaleko momasiku gatatu sigo gatano gaKotomba 2018, ihe Nghiwete okwa yamukula kutya elelo ndyoka kali li paveta,nonando okwa kala kohi yelelo ndyoka uule wethimbo.

Iilyo yelelo olya ulikwa palandulo lyompango yomutumba gwopaliamende ndjoka inayi tulwa natango miilonga naNghiwete okwa kala e shi shi okuza petameko.