Itandi thigi po iilonga - Hanse-Himarwa

Ngoloneya nale gwoshitopolwa shaHardap, Katrina Hanse-Himarwa okwa monika ondjo mOmpangu yoPombanda, kOmupanguli Christie Liebenberg. Otaka pewa egeelo lye momasiku 24 gaJuli nuumvo.Nonando ongaaka, ke na oompangela dhokuthigapo iilonga onga ominista yelongo.Okwa thiki pompangulilo a zala ohema ontokele nokukala ta minike aayambidhidhi ye.Aanambelewa yamwe po mepangelo oya wayimine ofamili yaHanse-Himarwa nookuume ke mboka yali ya yi oku ke mu yambidhidha.Maanambelewa moka omwa kwatelwa omunambelewa omukuluntu melongo, Anna Nghipondoka, omupopi megumbo lyOmutumba gwoPashigwana Loide Kasingo, omunambelewa omukuluntu muuministeli welongo Charles Kabajani, oshowo kuume kaHanse-Himarwa oshilyo shOmutumba gwoPashigwana, Margaret Mensah-Williams.Konima yetokolo ndyoka lya ningwa, Hanse-Himarwa okwa lombwele aayambidhidhi ye opo kaya uve nayi ta popi kutya olugodhi inalu hula natango. Hanse-Himarwa okwa monika ondjo melongitho pambambo lyombelewa ye nale onga ngoloneya gwoshitopolwa shaHardap, nokulundulula omusholondondo gwoonakumona omagumbo mopoloyeka yoMass Housing, mboka a pingenepo nofamili ye.Okwiipopile kutya ina tsakanena naakwanezimo mboka ta popi kutya gumwe omukwanezimo gwe gwokokule ihe ompangu oya mono kutya omukwanezimo ngoka ta popi, okamwanagona. Hanse-Himarwa nomukalelipo gwe, Sisa Namandje, oya popi kutya Okomisi yoAnti-Corruption Commission oya kala ya halelela oku mu tululamo oshipotha na oya ngongopo omahokololo gaagandji yuumbangi. Metokolo lye ndyoka a gandja mOmaandaha, Omupanguli Christie Liebenberg okwa popi kutya epangelo olya gandja uumbangi mboka tawu tothamo kutya omaipopilo gaHanse-Himarwa ogiifundja.“Osha hololwa nokutulwa polweela kutya omupangulwa okwa longitha oonkondo dhombelewa ye pambambo onga ngoloneya gwoshitopolwa opo omusholondondo gwoonakupewa omagumbo mopoloyeka yoMHDP gu lundululwe muuwanawa we, nomukwanezimo gwe a mone uuwanawa okuza momaihumbato ge ngoka. Omaihumbato ge ogeli oshimbuluma kohi yOmpango yoAnti-Corruption Act (ACA),” Omupanguli Liebenberg a popi. Omunongononi gwonkalo yopolotika, Ndumba Kamwanyah okwa popi kutya emoniko lyondjo lyaHanse-Himarwa oshi li onkundana ombwiinayi momeho goshigwana nomaiyuvo goshigwana.“Kashi shi ethimbo ewanawa omunapolotika a monike ondjo moNamibia ngashiingeyi. Otatu iyadha methimbo moka ongeyo yoshigwana kombinga yuulingilingi yi li pombanda oshowo omaindilo ogendji taga ningwa koshigwana opo ku pangulwe aanapolotika mboka taya longo uulingilingi. Kape na omalimbililo ota kala ta nyenyetelwa koshigwana.”Kombinga yiilonga ye, Kamwanyah okwa popi kutya eyonagulo ndyoka olyo pakathimbo owala, ta popi kutya emoniko lyondjo ihali yonagula opolotika moshilongo.“Otwa mona iipotha ya yooloka moka aantu mongundu yoSwapo mboka ya monika ondjoka ya tambulwa mongundu nomaako gaali. Shoka tashi vulu okuyonagula onkalo ye yiilonga ongele a tulwa modholongo nenge Omupresidende Hage Geingob e mu kutha miilonga onga ominista,” Kamwanyah a popi. Sho a ningilwa omapulo, amushanga gwoSwapo, Sophia Shaningwa okwa popi kutya ina landula oshipotha shoka na ita vulu okutya sha.“Ombili unene, kandi shi ehokololo ndyoka to popi.”Ontopolwa onti 47 yEkotampango lyaNamibia otayi popi kutya kape na omuntu ta vulu okuninga oshilyo shOmutumba gwoPashigwana moNamibia, ngele okwa monika ondjo nokupewa egeelo lyoomweedhi dhi vulithe 12 mondholongo, ongele egeelo ndyoka lya pu ongushu muule woomvula 10 omanga inaku ningwa omahogololo.JEMIMA BEUKES

Itandi thigi po iilonga - Hanse-Himarwa

Comments

Namibian Sun 2025-10-16

Please login to leave a comment

Itandi thigi po iilonga - Hanse-Himarwa

Comments

Namibian Sun 2025-10-16

Please login to leave a comment

Login