Iikulya ya yonuka tayi landithwa kuWoermann Brock

Etokolo lya ningwa kostola yaWoermann Brock opo yi patulule okasitola hoka haka landitha iikulya mboka ya yonuka oshowo ompumbwe yoompango dhina sha negameno lyoondya moNamibia , olya eta omaipulo ngele iikulya mbyoka otayi vulu tuu okuliwa, nenge uupyakadhi tawu etwa moshigwana.
Sha landula omapopyo kutya ope na ostola ndjoka hayi landitha iikulya ya yonuka ‘expire’, oshifokundaneki shoNamibian Sun osha ningi omakonaakono ngele ope na tuu oompango tadhi gamenene po aalandi moshilongo uuna taya landa iikulya mbyoka.
Kaantu oyendji oshitya ‘best before’ osha faathana noshitya ‘expiry date’ ihe shoka osha patanekwa kuWoermann Brock oshiwike shika.
Ositola ndjoka oya popi kutya ‘best before’ itashi ti kutya oshikulya osha yonuka nenge itashi vulu okuliwa.
Sho a ningilwa omapulaapulo, Michael Gawaseb gwoNamibia Consumer Trust okwa yelitha iitya mbyoka iyali , ta ti otayi vulu owala okugandja uuwanawa kaalandithi ihe ha kaalandi,
Okwa popi kutya iitya mbyoka oya tulilwa po aalandi opo ya nige omatokolo ngele otaya vulu okulanda nenge ahowe.
Okwa popi kutya kayi shi iikulya ayihe mbyoka ya thikana esiku ndyoka lya shangwa kiilya mbyoka, tayi vulu okuliwa kaantu, molwashoka ha iikulya oyindji hayi kala natango yi li nawa uuna ya thikana omasiku ngoka.
Okwa popi kutya iilongo oyindji ohayi longitha etumbulo ndyoka kiilya , opo ku yandwe onkalo yokweepitha iikulya ihe nonando oongaka iilongo mbyoka oyi na oompango dhoka tadhi kondolola onkalo ndjoka nokugamena woo aalandi.

Kombinga ngele elanditho lyiikulya mbyoka otali gandja omauwanawa kaalandithi nenge okaalandi, Gaweseb okwa popi kutya moNamibia onkalo ndjoka otayi gandja owala uuwanawa kaalandithi omolwa ompumbwe yeuveko moshilongo.
Okwa yelitha kutya ope na omwaka moompango dhaNamibia, sho kamu na ompango ndjoka tayi vulu okugamena aalandi.
ONamibian Sun, oya mono enyenyeto okuza kugumwe gwomaaleshi ye ngoka a popi kutya okwali a tumu okanona kositola ihe sho ka galuka iinima ayihe mbyoka ka landa oya pitilila momasiku ngoka ga shangwa kutya iinima mbyoka oyi li owala nawa, uuna tayi longithwa sigo omesiku ndyoka lyontumba.
Sho Namibian Sun ya thiki positola ndjoka tayi adhika moKhomas Grove Mall, omuniilonga gwomoWoermann Brock okwa li a thikama handiya yotunumbaanga omanga natango omuniilonga gwositola oyotuundjoka ta undula okatemba ke na iikulya mbyoka ya yonuka.
Omutoolinkundana gwoshifo shika okwa pula omuniilonga gumwe mboka yeli mositola ndjoka kutya omolwashike iikulya yawo mositola ndjoka yi na ombiliha noonkondo , na okwa yamukula kutya omolwaashoka kutya iikuya mbyoka oya yonuka.
“Iikulya yaza koGermany. Iiwanawa noonkondo na oya yonuka na oyi na woo ombiliha,” omuniilonga ngoka tati.
A fa a hala okulanda omutoolinkundana ngoka okwa tala konyala iikulya ayihe ihe omasiku gokuyonuka oga thikana.
Iikulya mbyoka ongaashi uuleke woochokolate, olives, nuuleke wokwalukehe.
Omasiku ngoka gokuyonuka gamwe oga tameka mo-2014.
Okasitola hoka ka kena edhina, na kape na woo shoka tashi ulukile aalandi kutya iinima mbyoka oya yonuka.
Menindjela gwaWoermann Brock gopashitopolwa , Willie Bierman, okwa popile etokolo lyokulanditha iikulya mbyoka, ta ti kutya ‘best before’, itashi ti iikulya oya yonuka.
Okwa popi kutya iikulya mbyoka oya pitikwa kutya otayi vulu okuliwa, sha ningwa kaanambelewa aakonaakoni yuundjolowele.
Sho a lombwelwa kutya iikulya yimwe oyi na omasiku gomomvula yo-2014, okwa yamukula kutya shoka itashi ti iikulya oya yonuka.
“Iikulya mbyoka oya konaakonwa. Nuuministeli wOkukondjitha Oluhepo owa holola ohokwe okulanda iikulya yimwe mbyoka.”


GORDON JOSEPH