Iikolokosha melelo lyaShakati

Omananathano ngoka oga tameke sha landula oshiyetwa po sha popiwa komunashipundi gwelelo ndyoka, Gabriel Kamwanka ngoka a pula eshunitho monima nekutho lyoonkondo okatokolitho kamwe hoka ka li ka ningwa oomwedhi dha piti.

Elelo lyondoolopa olya li lya ningi etokolo kutya otaku ka tseyithululwa oompito ne dhiilonga melelo moka.

Ompito ndhoka ongaashi yomunambelewa gwoompangela dhondoolopa a pyokoka, omunangeshefa gwomangeshefelo, menindja gwiiyemo oshowo menindja gwoompangela dhomaliko nomalanditho.

Shoka osha hala okutya oshikondo shiiyemo shoka ngashiingeyi tashi kwatelwa komeho kuDamian Hamunyela, otashi ka topolelwa oomenindja yaali, moka gumwe taka kala noshinakugwanithwa shokuungaunga niimaliwa, omaliko niifuta yondoolopa omanga omukwawo taka kala noshinakugwanithwa shokugongela iiyemo yondoolopa.

Oshikondo shoompangela nomaliko gondoolopa shoka tashi kwatelwa komeho kuOrestus Shilunga, otashi ka topolwa nasho miitopolwa iyali nomunambelewa gumwe otaka kala noshitopolwa shoompangela omanga mukwawo taka kala noshitopolwa shomaiko.

Hamunyela okwa a halika a kale omukomeho gwoshikondo shokugongela iiyemo yondoolopa omanga ompito yimwe tayi ka tseyithwa.

Okwa popiwa kutya ke na ontseyo na oha mono eyambidhidho okuza koTsumeb opo a tule kumwe omambo gondoolopa.

Shilunga okwa halika aniwa a kale omukomeho gwoshikondo shoompangela ihe naye otaku popiwa kutya ke na uunongo oku na owala ontseyo koshikondo shokuungaunga nomaliko.

Oompaangela dhondoolopa aniwa ohadhi ningwa kehangano lyopaumwene pauyelele mboka wuniwe koNamibian Sun.

Nonando ongaaka, onzo yimwe oya popi kutya Shilunga naHamunyela inaya nyanyukilwa omatokolo ngka ga ningwa.

“Shilunga okwa hala opoosa yoompangela omanga Damian a hala opoosa yiyemo ndhoka dhatseyithwa na inaya hala dhoka ya pewa,” onzo ya popi.

Emily Alweendo, ngoka ha longele oshikondo shiiyemo mondoolopa moka oye gumwe ngoka a zi mo sha landula etseyitho ndyoka lya ningwa.

Nonando ongaaka pethimbo lyomutumba gwelelo ngoka gwa ningwa, euliko ye olya kuthwa mo momusholondondo gwiikundathanwa yomutumba sha landula oshiyetwapo shaKamwanka.

Onzo oya holola kutya Kamwanka okwa hala Hamutenya ngoka aniwa omonagona na okuli omonamati gwomupeha mayola gwondoolopa, Ndamononghenda Hamunyela.

Shoka osha etitha elelo li hogolole tali popile oshiyetwa po she nenge itali popile, noshiyetwapo she inashi popilwa.

Kamwanka okwa li woo a pula oshikumungu shoka shi kuthwe mo miikundathanwa molwaashoka ookansela kaya li mo momutumba ihe natango epulo ndyoka olya tindwa.

Mayola Angelus Iyambo okwa popi kutya otaya kwatelwa komeho komilandu nkene ye na okuungaunga niikumungu.

“Ompango yomalelo goondoolopa oya yela, ngele mboka ye li momutumba otaya hogolola taya popile oshiyetwa po ihe omawi inaga thika poopresenda 75, nena oshiyetwa po shoka otashi ekelwahi,” Iyambo a popi.

Pethimbo lyoompata ndhoka, Kamwanka okwa lundile omunambelewa omukuluntu gwondoolopa, Werner Iita kutya okwa ulike aantu yaali moshikondo sho procurement department shaaheli pamulandu.

Kamwanka okwa gandja oombaapila dhoka e na tadhi ulike kutya Iita ke na oonkondo dhokuulika aaniilonga.

Iita okwiipopile kutya yimwe yomoombaapila eyamukulo lya zi kominista yemona Calle Schlettwein.

“Uuna oshiputudhilo shahala okutota oshikondo sho procurement management unit (PMU) ngaashi iinakugwanithwa tayi tothwa mo komilandu, nena omilandu dhoshikondo shoonzo dhopauntu odha pumbwa okulandulwa omanga omunambelewa gomayalulo ina ninga omauliko ngoka ngaashi tashi uthwa kontopolwa 12(1),” ombaapila yaSchlettwein ya holola.

Iita okwa yelitha kutya okwa landula omilandu dhoonzo dhopauntu nomauliko ngoka a ningi oge li paveta.



KENYA KAMBOWE