Hidipo a shuna koSwapo

Gumwe gwomwaakwaSwapo nale na okwa li a dhigi po ongundu ndjoka konima shoBen Ulenga a dhigi po oSwapo mo-1999 okwa ndjoina ishewe oSwapo. Hidipo Hamutenya ngoka e li omutotipoo gwongundu yoRally for Democracy and Progress (RDP) konima sho adhigi po oSwapo mo-2007 okwa shuna koSwapo konima sho uundulwamo mongundu ye ndjoka a totopo. Etokolo lye okwe li ningi konima sho a yi kuulalelo wopaumwene megumbo lyepangelo nOmupresidende Hage Geingob oshowo omupopi moPaliamende nale, Theo-Ben Gurirab. Potumba gwiikundaneki ngoka gwa ningilwa poombonge dhoSwapo mEtine lya piti Hamutenya okwa tindi okupopya sha kombinga yetokolo lye okushuna koSwapo ihe okwa popi kutya epangelo lyaGeingob olya shuna onkalo yuukumwe mongundu , oshinima shoka shali sha kanamo mo-2007. Hamutenya okwa popi kutya okwa li a thiminikwa okuthiga po oSwapo omolwa omaiyuvo kutya kamu na onakuyiwa mongundu. Pahapu dhe Geingob ota kambadhala okweeta uukumwe mongundu ndjoka naashoka osho shemuthiminike a shune kegumbo. Hamutenya okwa li nale gumwe gwomaanenentu mboka ya simanekwa mongundu tayi pangele na okwali nokuli a ningi gumwe gwomookandidate dhaahogololwa yomupresidende gwongundu. Pethimbo lyoonkundathana dhoka a ningwa naye mo-2012 Hamutenya okwa holola omaiyuvo ge kutya omukokoli presidende okwa kala ta kambadhala opo ka sindanepo omahogololo guupresidende wongundu ngoka ga ningwa mo-2004. Nonando ongaaka gumwe gwomaanongononi yopolotika ,Hoze Riruako, okwa popi kutya eshuno lyaHamutenya koSwapo itali ka eta omalunduluko gasha. Riruako okwa popi kutya Ongundu yoSwapo ihayi lilile omayambidhidho ihe onkalo ndjoka otayi gandja owala uuwanawa kuHamutenya yemwene. Riruako okwa nyanyukilwa woo onkalo ndjoka sho Geingob a hiya Hamutenya pwaahena uutile washa nomanyano okuza kaanenentu mongundu nenge kaayambidhidhi. Omunongononi gumwe Graham Hopwood, okwa popi kutya eshuno lyaHmutenya koSwapo otali endele pamwe nokukala uumbangi woohapu dhaGeingob sho a popi kutya ka pe na ngoka ta dhigalapo melelo lye. Okwa popi kutya etokolo lyaHamutenya otali nyana oRDP molwaashoka ongundu ndjoka oya udha owala aayambidhidhi yaHamutenya naamboka ye wete ya ningwa nayi koSwapo pethimbo gwomutumba gwomahogololo gomo-2004. Okwa popi kutya sho omutotipo gwoRDP a shuna koSwapo nena oyendji yomaayambidhidhi ye otashi vulika ya ka shune koSwapo. OVENDUKA JEMIMA BEUKES