Geingob a gandja omahekeleko kofamili yanakudhipagwa komukwiita

Omupresidende okupitila momupopiliko gwe Alfred Hengari okwa lombwele oNamibian Sun kutya, oshiningwanima shoka shedhipago lyomuhingi gwotaxi osha ningwa paupya na otashi ka ungaungiwa nasho kwiikwatelelwa koveta yoshilongo.

Ombelewa yomupresidende oya popi kutya ekanitho lyomwenyo oshinima oshiwinayi na oya koleke kutya omupresidende okwa gandja omahekeleko koofamili yaBlack, omukwashigwana gwaZimbabwe ngoka a li omukalimo gwomOvenduka onga omuhingi gwotaxi pethimbo a yahwa okusa komukwiita mboka yali taya ningi opatolola moshilandopangelo, oshiwike sha piti.

Ombelewa yomupresidende oya holola kutya naku ninga edhipago ndyoka okwa tulwa miipandeko noveta yoshilongo otayi ka ungaunga noshikumungu shoka. Hengari okwa lombwele Namibian Sun kutya omupresidende okwiitulamo mekondjitho lyiimbulumaa ndyoka li li omukundu omunene gwa taalela oshigwana.

Sho a yamukula komaaindilo taga ningwa koshigwana opo aakwiita ya kuthwemo momapandanda, Ombelewa yOmupresidende oya yamukula kutya Geingob aluhe ota kwatelwa komeho kEkotampango, netulo lyaakwiita momapandanda meyambidhidho lyOpolisi mokukondjitha iimbuluma oshi li tashi endele pamwe nekotampango.

Oya popi kutya ekaleko lyegameno moshigwana okuza komiyonena osha simana opo ku vule okunanwa aatalelipo oshowo aayenda moNamibia. Pethimbo lyeindilo ndyoka lya ningwa kongundu yoNational Unity Democratic Organisation (Nudo) of Namibia ongula yOmaandaha, Geingob okwa lombwele aatoolinkundana kutya aakwiita otaya kala taya longele kumwe nopolisi mokukondjitha iimbuluma sigo onkalo ya hwepopala. Okwa nyana edhipago ndyoka ta popi kutya aakwiita oya pumbwa okukala aayambidhidhi yopatolola ndjoka ihe inaya pumbwa okukala aakomeho.

Okwa ningwa eindilo lyopamalungulo ndyoka tali pula ehulithepo lyo Operation Kalahari Desert, ndyoka lya mono omashaino geli po 7 000 gomomashaino 7 500 ngoka ga pumbiwa opo eindilo ndyoka li gandjwe komalelo gomondjila.

Omukandanyenyeto ngoka tagu pula woo Swapo a hulithe po etungo lyoombonge dhe lyondilo na ogwa lundile epangelo kutya ethindilo lyaakwiita mokati kaakwashigwana omukalo kagu li mondjila.

Aakwashigwana mboka ya shaina omukandanyenyeto ngoka oya holola kutya omamomitho giihuna ngoka taga ningilwa aakwashigwana kaaakwiita kage li pauntu na otaga yi pondje uuthemba womuntu.

Omukwashigwana gwaNamibia ngoka eli omukalimo gwomoCanada ngashiingeyi, Victor Indongo, okwa pula omupresidende Geingob ngele okwa gamenwa nga okugalukila kegumbo. Nonando ongaaka AaNamibia oyendji otaya popile opatolola ndjoka yo Operation Kalahari Desert, taya popile ompumbwe yokukala kwaanambelewa yegameno momapandanda. Omukwashigwana gumwe okwa shanga kepandja lyoNamibian Sun kutya, opatolola ndjoka nayi tsikile molwaashoka kape na gumwe e li pombanda yoveta, nongele omunambelewa gwopolisi nenge omukwiita okwa gopola nena na ungaungiwe naye kompango.

Omukwashigwana gumwe okwa popi kutya opatolola nayi tsikile ihe aakwiita naya dheulwe nkene ye na okwiihumbata moshigwana nokuungaunga naakwashigwana.

Toni Hancox, omukomeho gwoLegal Assistance Centre (LAC), okwa yelitha kutya mOmpango yEgameno, uuna aakwiita ya pewa oshinakugwanithwa shokuyambidhidha opolisi oya pumbwa okukala ye na oonkondo niilonga ya faathana naambyoka yaapolisi.

Okwa popi kutya paveta ndjoka, aakwiita oye na oshinakugwanithwa shokulongitha oonkondo ooshona uuna taya tula miipandeko ihe moshiningwanima shedhipago shoka sha ningwa, kapwa li etulo miipandeko tali ningwa onkene kasha li mondjila aakwiita ya longithe oonkondo dha sha.



JANA-MARI SMITH