Evi Ambambi a ninga mwene womukunda Oshipuku-B

Elelo loshikandjo Otuwala mUukwambi ola ulika meme Evi Ambambi a ninge mwene wOshipuku-B, omukunda oo u li meni leengaba dodoolopa yaShakati, ashike pamifyuululwakalo ou li koshi yoshikandjo Otuwala mewiliko lelenga ekulunhu Abner Nuule. Ambambi okwa ulikilwa oshiwana pefimbo loshiifanene showina sha ningilwa peumbo laye mEenhokela mEtitatu komatango. Osheendo eshi she uyile okuulika mwene womukunda mupe osha li shi kwetelwe komesho kuhamushanga wOtuwala, Linus Wilhelm. Wilhelm okwa fatulula nghee elelo lopamifyuululwakalo hali longo na nghee hashi ende opo omunhu a ninge omuwiliki wopamifyuululwakalo. Okwa ti ope na ovanhu vamwe hava kala tava pula omahoololo oovene vomikunda, osho ta ti kasha li mondjila. “Oovene vomikunda ihava hoololwa ngaashi ovanapolitika ovo hava hoololwa nova va pewa oufefimbo ou ve na okulela. Oovene vomikunda ohava ulikwa kelelo loshilongo noshilonga shavo otashi kalelele, kakele shapo ngeenge mwene womukunda a nyona, opo ashike ta duku okukufwa omukunda ile a tulwe pedu pakafimbo,” osho Wilhelm a ti ngaho. Okwa ndjadjukununa oshilonga sha mwene womukunda, ye ta popi yo nokutya mwene womukunda ke na okulonga oye aeke ndele oku na okukala e na kapatashu, hamushanga nokomitiye yomukunda. Ava tava longele kumwe naAmbambi mewiliko lomukunda Oshipuku-B navo ova ulikilwa yo oshiwana. Isak Elishi oye kapatashu; hamushanga womukunda oye Ana Taapopi nomukwafi waye Eufrosine Iyambo. Jonathan Ananias oye omudiinini woiniwe ta kwafelwa kuMaria Katambo, omanga Monika Nambahu e li omuyandjimayele. Mokuulika ovawiliki ava Wilhelm okwa popya ta ti omukalimo keshe a pumbwa eyapulo lopamufyuululwakalo ile e na oupyakadi tete oku na okuya kumwene womukunda ile kkukapatashu, nongeenge ina mona ekwafo a hala, opo nee nawa ta twala oudjuu waye koshipundi sha landula ko fiyo a fika kelelo loshilongo. Okwa ti efimbo limwe omayakulo otashi dulika monika a fa taa ende kashona molwaashi ovawiliki peendodo da yoolokafana ove na okuninga omakonaakono manga inava ninga omatokolo, ashike okwa yandja eshilipaleko nokutya kape na omukalimo ta kala ina pewa ekwafo olo ta pula. Okwa ti ope na nee oovene vomikunda vamwe inave litula moilonga yavo, ihava holoka konoyoongalele yoshikandjo. “Ope na oovene vomikunda ihava hokola koyoongalele yoshikandjo. Umwe ota holoka nande lumwaaluke mumudo, osho itashi lididimikilwa nande nande. Modula tai ya oovene vomikunda va tya ngaha otava ka katukilwa onghatu,” osho Wilhelm a ti. Kombinga yomikunda odo di li meni leengaba dodoolopa Wilhelm okwa fatulula ta ti, edu olaMuni ashike ovanhu ovelelo lopamifyuululwakalo. “Momikunda edi di li meni lodoolopa, fye ihatu ungaunga noinima ya pamba edu, ohatu ungaunga ashike noinima oyo ya pamba omayakulo opamifyuululwakalo,” osho a ti ngaho. Omukunda Oshipuku-B oshitukulwa shEenhokele sha ama kOumbuwanhu wondjila oyo ya finda kOkahao. Kouningino owa twa molukanda Uupindi, omanga kombinga yokOumbuwanhu wa xulila mepandavanda la finda koUnam. Wilhelm okwa ti eshi sha ningwa mEtitatu peumbo lameme Evi Ambambi euliko ashike lovawiliki vomukunda, ashike enangeko otali uya okuningwa nale. Oshivilo osha li tashi mwenyekwa kongudulwiimbo ya konekwa nalwa moshakati nomudingonoko, Longela Omwene. Poshiifanene opa kalwa yo koovene vomikunda dopoushiinda nokovawiliki vopamhepo vomaongalo e lili naku lili. OSHAKATI PLACIDO HILUKILWA